港股急升後整固，高位有承接力，恒指在75點的狹窄範圍內上落，收市9397，升13點，仍受制9400的阻力，成交只得47億元。前路阻力重重，成交如此奀，焉能破位！
羊年港股點睇？高人開聲，話羊年大體形勢比馬年為佳，但3月及4月（舊曆計）係羊年最壞的兩個月，股市有機會大跌，唔排除再有恐怖襲擊出現。至於正月同2月，大市會在窄幅內上落，波動唔會太大，但踏入3月，就要小心。
高人話，經過3、4兩個月大跌市後，5月將會見底回升，下半年升市就會再現，可以放心睇好。3、4月跌得愈深，下半年就升得更有力。
美伊開戰危機暫時紓緩，但拖得幾耐，冇人知，只有奇迹出現先可以避免戰事爆發。高人話舊曆3、4月好差，可能就係美英向伊拉克動武之時，舊曆5月打完仗，投資者就可以放心入市，再無後顧之憂。
幾家大行嘅專家都認為，美伊開戰將影響美國經濟的復甦步伐，但如果能速戰速決，影響程度將可減到最低。ING指美伊戰事一完結，亞洲股市將會大幅飆升2至3成。
ING預期大戰過後，多個行業股票將會大幅上升，包括航空公司、金融機構和資訊科技；公用、零售和電訊公司的表現將會稍遜。
家吓大市反覆，方向雖未明，但噚日仍有近250隻股票（不計認股證）上升，炒個別仍有可為。噚日推介的高寶綠色（274），高價見1.40元，收1.38元，僅升1仙，但有3800多萬股的大成交，升勢卻未能再進一步，似乎在1.4元水平壓力非輕，需待消化後才能再破位而上，建議可在1.34元吸納，短期目標1.6元，以02年預測PE4.5倍，03年3.5倍計，股價應不會在低位蟄伏太久。
國企股續調整，在20日線爭持，表現最差係上海石化（338），收1.27元，連50日線都跌穿，大行拋售絕不留手，由1.4元開始，質到噚日都未停手。上石化由高位1.46元回落，跌幅雖達13%，但短期跌勢未止，初步支持位1.2元。石化股短線走勢轉弱，中線仍可看好。
郭兆誠