昨日成班經紀最熱門嘅話題，就係上周五富泰大中華（1226）股價急跌，有證券行經紀被牽連，邀請協助調查。事件真相究竟係點？小初暫時唔知，但搞到要驚動官府，就確係大件事。
由於涉案證券行噚日冇做生意，唔見有買賣盤掛出，所以好多行家都關心，一來係八卦，二來據聞除富泰大中華外，可能亦有其他股票牽涉在內，會再出現股價插水事件。
不過，八卦之餘，大家仍然關心個人福祉，即係點樣搵錢。噚日經紀陳叫小初，留意一下依利安達（033），話隻股稍後可能有異動。依利安達呢排股價守住1元水平，噚日收1.05元。建滔化工（148）近期則頻頻增持，最新已經係揸到21%。
舊年依利安達曾公開講過，話同建滔冇嘢合作。但經紀陳話，呢啲係舊年嘅事，據講今年大家已經有共識，唔排除在不久將來，真係有嘢合作。佢重話，有關人等差不多收夠貨，當呢個月出完業績之後，就會有好戲上演。
慕容小初