我大口羅拉都幾欣賞中島美嘉，佢做戲同唱歌都咁掂，又保持到一份高格調嘅形象。早排美嘉出寫真集，都堅持唔露肉唔搞cheap自己，真係有格！雖然美嘉唔走性感路線，但唔代表佢本寫真冇嘢睇，淨係佢首次攞隻愛貓出嚟拍親密照已經夠晒頂癮啦。
中島美嘉隻貓叫Dio，即係意大利文「神」嘅意思，係美嘉一個識意大利文嘅朋友幫佢改嘅。佢真係當正Dio係神咁重要，單係本寫真集《Dio》都係以隻貓個名命名就係最佳例證啦。好鍾意同貓仔及兔仔玩嘅美嘉話，以前細個喺屋企有養小動物，𠵱家搬出嚟一個人住，點都要有Dio陪住先至得喎。美嘉自己唔急住做媽咪，但係佢就好希望Dio快啲做爹哋，佢話Dio有氣有力做貓爸爸，所以搵定朋友嘅貓女做佢未婚妻，美嘉希望Dio快啲「造貓」成功，期待Dio二世出生喎！
而對養狗好有研究嘅女星川原亞矢子，最近就將自己平日整畀隻狗嘅菜式，輯錄成一本狗食譜公開發售，等佢可以同其他愛狗之人分享。