東亞銀行宣佈○二年業績，純利十二億八千八百萬元，倒退二成，分析師大跌眼鏡，睇真啲，股東應佔利與○一年比較少咗三億一千萬，內含「重估物業虧損」九千二百萬、「出售固定資產虧損」三千一百萬，兩者相加已有一億二千幾，佔純利一成，今年睇怕唔會再有呢啲虧損啩。另外，收購前第一太平銀行嘅信用卡貸款撇帳二十五巴仙，遠遠超出市場平均，相信係趁破產率高，倒垃圾一次過倒晒，以後乾淨好多，而且收購返嚟嘅「商譽」，重唔乘機撇除咩。計來計去，東亞今年會反彈，唔怪得佢嘅股價先跌後升！
寶哥哥宣佈業績之時，因業績唔理想，睇來心情唔靚，散會後俾記者挑撥，立即露出真情，痛罵葉劉淑儀唔professional，果然不愧係銀行界嘅良心。左丁山與老友記在「銀行家會所」食午飯，賓架Ｕ大聲叫好，話寶哥哥好嘢。賓架Ｕ話：「我哋慣咗尊重高官，高官親自問到，梗係大聲話原則上支持二十三條立法，然後細細聲話『之不過、但係……』若果成班人與高官開會，多數係禮貌周周，盡量唔頂嘴。而寶哥哥反映意見就唔同咯，盡訴心中情，寶哥哥所言，一定真實反映銀行界意見。保安局打電話嚟，大家虛應故事啫，點會講心底話。」
賓架Ｕ亦有坐響某些政府諮詢委員會，慣咗順應大方向講嘢，唔係驚自己得罪人，而係怕銀行主席知道佢踩親高官之後，向佢詐型！好彩寶哥哥就係銀行主席，講嘢咪真實啲囉！