黃秋生同余文樂繼拍《無間道》之後，再度喺港台劇集《執法群英》之《拆彈專家》合作，雖然佢哋兩個唔係飾演上司同下屬，但秋生飾演拆彈專家，余文樂就飾演衝鋒隊隊員，兩個人工作關係都好密切。而前晚佢哋喺屯門拍煞科戲，馮仁昭無意中聽到余文樂叫秋生做師傅。
秋生笑笑口咁話：「佢哋畀面啫！我間中都會教吓啲後生仔做戲，多幾個識做戲嘅唔好咩？好似謝霆鋒、陳冠希同陳奕迅咁，間唔中都會叫我做師傅，第時我唔拍戲，都可以轉行教人做戲！」原來自從《無間道》之後，秋生唔單止多咗余文樂呢個徒弟，而且工作亦排到下年四月，係佢入行以嚟最巴閉嘅一次。
前晚秋生同余文樂喺一間財務公司拍戲，港台為咗方便拍攝，要將財務公司門口嘅巴士站搬離二十呎，雖然只係搬一搬個巴士站，但港台方面都要同運輸署、路政署等幾個部門申請，做足晒所有工夫，認真程度真係唔到你唔服！
日本靚女明星酒井法子自創嘅潮流服飾品牌即將面世，噚日佢着住自己品牌嘅牛仔衫喺東京伊藤忠貿易公司做宣傳。
酒井法子同記者講話希望自己設計嘅衫，除咗可以打入日本巿場之外，重可以打入其他亞洲巿場，好似台灣同香港咁。酒井法子咁可愛，如果佢親自嚟香港宣傳，我馮仁昭一定去捧場！
哥哥張國榮同好友唐唐（唐鶴德）一直都有喺上環濟公廟度，有廟祝幫佢哋燒塔香，祈求一切順利。不過，噚日馮仁昭啱啱經過濟公廟，就發現唔見咗哥哥同唐唐嘅塔香，唔知係咪同去年傳佢哋感情有變有關呢？
馮仁昭再睇真啲，發覺多咗周正毅全家同楊受成嘅塔香，睇嚟經過上年嘅是是非非，兩人都想祈求今年諸事順利。
台灣組合WEWE嘅其中一個成員李威前日嚟咗香港做宣傳，噚日佢就去咗商台接受訪問，李威話喺娛樂圈交朋友好難，不過佢因為同Twins拍過兩次廣告，所以同佢哋成為朋友，有時重會互通電話。而李威對於Twins沒完沒了嘅緋聞，都戥佢哋可憐，而且李威話Twins對於一啲唔好嘅報道都好在意，所以都有勸過佢哋要放鬆啲。
向海嵐同譚耀文噚日喺黃埔拍無綫新劇《生命天使》，佢哋飾演一對情侶，但譚耀文對向海嵐就非常冷淡。向海嵐話呢套劇有唔少劇情喺兒童之家拍攝，所以為遷就小朋友要喺周末同周日取景，不過向海嵐就冇喺兒童之家嘅戲份，佢話：「所以我拍呢套劇就只係返周一到周五，其他周末同周日就可以放假。」
葉璇上個星期五二十三歲生日，嗰日佢要同男子組合Shine喺麗聲郵輪拍外景，Shine同攝製隊更為「壽星女」搞咗個神秘生日會。
葉璇前日同大約七十個fans喺大埔一間餐廳補祝生日，當中有來自美國同台灣嘅fans，葉璇噚日喺電話訪問話：「當中有一對夫婦，太太重係大住肚嚟參加，我真係好多謝佢哋。」葉璇收到過百份生日禮物，佢話：「我最鍾意個fans親手用我唔同劇集嘅造型照，整咗個月曆。」
