新年流流，立法會班議員被審計署「辣㷫」，話立法會九年來攞多咗政府五千萬，應向政府「退款」。家陣財赤嚴重，財爺正周圍搵目標「共佢產」，立法會筆錢睇怕都好難保得住。
班議員梗係㷫啦，慳家竟然俾人話係「攞多咗」，因為佢哋認為，政府一向以一筆過撥款原則畀錢立法會，全靠立法會咁多年慳慳埋埋先有呢筆儲備。有人更發晦氣，問政府係咪要迫人每年使清使淨啲錢先至安樂？
八方又聽到立法會秘書處決定，同傳媒喺鏞記食埋二月二十七日餐開年飯，以後再冇呢支歌仔唱；每年立法年度，逐間報館食餐medialunch亦都cut埋；連印刷精美嘅立法會年報都會成為絕響，以後只會出光碟版及網上版，總之就要勒緊褲頭啦！
傳真︰2623-9278
電郵︰