陳奕迅（Eason）前晚個唱開鑼，謝霆鋒現身撐場，安哥時歌迷更大叫霆鋒的名字。事後問Eason可覺被霆鋒搶鏡，他說：「佢冇搶我塊鏡。」對於霆鋒即將復出，Eason笑指最好遲一些，以免影響其工作量。
陳奕迅一連七場的個人演唱會，前晚舉行首場演出，女友徐濠縈、父親陳裘大、好友謝霆鋒、英皇3T、男子組合Boy'Z、英皇老闆楊受成和汪琳等到場欣賞，霆鋒在台下豎起大拇指大讚Eason的演唱會好看，完騷後霆鋒即返回馬己仙峽道的寓所。
安哥時Eason的歌迷大叫霆鋒的名字，Eason接受訪問時，對於可覺霆鋒搶鏡說：「佢冇搶我塊鏡。」至於霆鋒即將復出，Eason笑說：「我叫佢遲啲，佢早啲復出我可能少啲嘢做。」另外Eason又說：「霆鋒都係着番前年四台聯頒獎套西裝嚟，都話佢冇錢㗎啦。」
去年Eason在台灣演出時不慎撞傷下體，但前晚他在布置成地盤一樣的舞台上仍然落力又唱又跳，Eason說：「今晚（即前晚）個舞台整得好好，唔會跣腳整到重要部位，雖然地下好多窿，但啲窿下面都放咗好多紙皮箱，以防萬一。」
歌迷在台下亦大叫Eason肥仔和靚仔，他即說：「唔想喺呢個場合叫我肥仔，我好肥咩，我有一百八十幾磅，淨係隻腳都一百磅，不過叫我靚仔都要睇埋我隻腳會唔會影響我個樣。」
此外，有歌迷帶同酒精飲品進場，遭場館人員沒收，Eason說：「我都唔知唔可以帶呢啲飲品入場，呢次演唱會我嘅服裝花費約六位數字，我好滿意形象同表現。」Eason其中的「古烈治look」，駁髮用的全是毛冷，所以在放煙花時他也擔心會燒到假髮。
採訪：陳梅香
攝影：仇志德
