名人談快樂。有一個說，抱住個女，一家大細逛公園，就是快樂。怪唔得香港人唔快樂。畀着個住家麻甩男人當家作主，為市民亂出主張，當正高薪公職僅僅就是，帶住兩個女（一個老婆一個女）闔家大細出巡，遊吓公園求吓籤的；作狀影相，派記者利是，請傳媒專欄人飲茶，that'sit。唔使驗DNA都知，你不是他的老婆或者個女，是以他快樂，市民不一定快樂；他愈快樂，市民一定愈墮落。快樂像輕輕的下巴，天可憐見，就成全佢啦，叫佢落台，快快樂樂行公園啦。
名人快樂談，未必肯交心剖白快樂心情。咁，等我估吓，下列名人的非典型快樂觀。
掃把局長：二十隻手指腳趾甲，搽滿廿三種甲油，快樂到痺。
黑衫司長：一次過喺頭頂紮廿三隻髻，插廿三枝利刀狀的髻釵，亢奮fing晒頭。
豬姐：做個撐廿三的中國公民，high到兩眼翻白、珠唇發震。
1A：叫人幫我拎住件fur，我好fit咁蹲低執垃圾。
阿蟲：沒有國、哪有家，家家加稅，精忠報國最開心。
阿董：最快樂係湊孫，所以，我鍾意將市民當龜孫咁揍。