羊年至，總結一下馬年成果。「喇沙T」過去一年賣波鞋賺到唔少，佢並無波鞋舖，只從相熟老闆留批搶手鞋，以正價入高價出，轉賣畀其他波鞋兒童。「喇沙T」話舊年多咗好多新人入行，搞到𠵱家競爭愈來愈大。
喇沙T：「舊年全靠『關刀科時』撈到唔少，不過年尾已現疲態，接力嘅相信係『登』。好多人睇好『卑耍』同ACG，尤其ACG對『瘋木』，曾經同香港人Crossover過，相信來年會繼續力谷。不過我哋走貨嘅，就認為呢啲係虛火，好快過氣。講韌力，點及『登』，尤其『尊貴』系列，上個月出對啡皮『尊貴登』就爆到七彩，聽講波鞋街『車輪多』因為呢對鞋執咗過十萬。」
喇沙T繼續：「係人都知，『關刀』每次出搶手貨，『車輪多』不嬲都扣起啲鞋唔擺門口賣，轉手成批賣畀日本仔，嗰批『尊貴登』就全部留晒畀日本仔，聽講每對$1,400，如果計埋『車輪多』六折攞貨，呢批貨佢哋就穩袋11萬。
「如果呢批勁貨被我哋『艇仔』擸到，真係可以休息三個月唔使做。不過，呢啲勁貨點到我哋擸？惟有勤力啲，繼續去『關刀』正店排隊搶貨，反正波鞋街啲鞋唔會攞出嚟賣。」
主持人：大食Jack
八卦熱報：