中電噚日去中環文華東方酒店同傳媒春節聯歡，中電集團常務董事包立賢一開始就講笑話唔使旨意打聽下周一嘅業績報告，佢唔會講㗎喇。但其實同咁多中電高層聚首一堂，記者點會走雞。中電嘅中國專家李銳波甚少露面，一出現馬上被團團圍住，問佢大陸嘅發展前景。
轉過頭，俾八方見到中電女強人──常務董事阮蘇少湄，問阮太同政府就利潤管制法則中期檢討傾成點？佢若無其事，話成日都同政府傾㗎啦，冇乜特別吖，以前同李淑儀傾，𠵱家咪同葉澍堃傾，總之乜都有得傾。
咁葉局長曾經暗示中電喺此時此刻應該識做，冇理由重有保證利潤咁着數。點知阮太馬上話唔通你想任中電收幾多都唔管咩？唔通香港想學外國開放電力供應市場搞到收唔到科咩？梗係唔想，但係咁點先至可以慳番啲電費呢？
阮太於是教八方唔好睇少啲家用電器，好似電熨斗咁，就耗電量好大，所以佢教個菲傭慳電辦法──勿長期開電器，特別會發熱嗰啲，電暖爐、乾衣機、冷氣機、焗爐用電最多，成日開住個電腦都好襟計。想再知多啲就入中電網址
阮太數口咁厲害，唔怪得噚日玩估領袖遊戲，佢被形容為中電談判高手，內外兼備，家庭事業都咁掂。雖然個遊戲幾擦鞋，但又唔假得晒嘅。
至於遊戲禮物，就好有心思，全部都係癈物利用，都幾得意㗎！
傳真︰2623-9278
電郵︰