發展商賣樓，要令參觀者留下深刻印象，兼引起興趣入市，示範單位嘅包裝愈來愈重要，因為示範單位代表着樓盤嘅形象，可以打動買家芳心。所以近來唔少新盤示範單位，就用上唔同主題概念，令準買家一見難忘。
一向着重生活品味嘅永泰亞洲，旗下樓盤亦貫徹追求品味風格，集團月前喺佢哋嘅尖沙嘴漾日居，整咗個複式示範單位，以著名電影占士邦做主題，名為「Bondsuite」，結果呢個二千幾呎連天台嘅複式示範單位，火速賣出。
條橋咁受落，永泰亞洲食過番尋味。集團企業總監李太話，現時正準備占士邦複式「續集」，喺現樓整多個同類複式，再畀市場一個驚喜。
集團打算下半年推出嘅西貢獨立屋項目，會刻意喺外觀花心思，細節就下回分解。
𠵱家做代理真係唔容易，少啲恒心同毅力都唔得。好似中原地產鰂魚涌高級區域經理吳炳深，同高級客戶經理施建宇，游說鰂魚涌康怡花園一名業主換樓，經過3年時間，業主終斥資八百萬，購入薄扶林貝沙灣一個千六呎單位。
呢單交易喺周日凌晨做成，但係兩個代理都冇乜點唞，就去參加喺清晨五點舉行嘅馬拉松十公里長跑，真係可以用鐵人嚟形容。唔怪得佢哋扯單時咁有恒心同耐性啦。
西貢濤苑由兩間建材商合組嘅健聯發展合作興建，唔講唔知，原來健聯係西貢區大業主。
健聯董事黃寶戀透露，公司早於十五年前，即八十年代尾，已經開始喺西貢發展住宅，超過一百座物業，包括清水灣及西貢嘅別墅同低密度住宅，部份已經賣散，亦有部份仍保留收租，今次推出嘅西貢濤苑，都屬於同類嘅發展項目。
據知，雖然公司嘅投資集中西貢區，但喺其他地區都有樓收租，不過黃小姐就要保持低調嘅作風，未有進一步透露。
房委會公屋管理私營化，每年都有屋苑管理合約招標，成為物業管理公司嘅一個收入來源。不過，喺呢個私營化計劃之下，中標嘅管理公司，只收取標書列明嘅酬金，要自負盈虧；同時，要聘請一定數目嘅房署員工。
睇落好似賺硬，但原來都有風險。因為房署嘅職員名額唔係咁易請夠數，所以物業管理公司除咗要搞多啲房署職員招聘會，重可能要高薪向同行挖角。
據聞若請唔夠數，要按職級交罰款畀房委會，好似話介乎每月一千蚊到一萬蚊。若果管理期內一直都請唔夠數，淨係交罰款，條數都好襟計。
豪宅買家通常都非富則貴，買樓講求品牌，又要有身份象徵。長實畢架山一號，英文名為OneBeaconHill，高級營業經理郭子威話，集團現正物色BH字頭嘅車牌，打算送畀畢架山一號嘅住戶，等佢哋有尊貴嘅身份象徵。搞咗個全城BH車牌大招募行動，計劃動用五百萬元買入十至五十個靚號碼車牌。
呢招推廣樓盤方法都算創新，話唔定令呢類車牌升值十倍。不過，郭生話，最好個車牌數字喺好意頭，例如3字8字，4字則免。至於1字，就更加正，完全跟英文名一樣。
美聯美善會，做代理之餘，都參與義工活動，佢哋今年服務對象係兒童。羊年第一擊就係由十幾名義工，帶同保良局約三十個兒童，去天水圍郊遊。小朋友喺義工陪同下一齊自製風箏同放風箏、喺河邊餵鴨、沙上繪畫同埋認識農作物。美聯窩打老道京士柏分行同事Panny許，透過募捐及自掏腰包，共得到六十幾個公仔送畀小朋友。啲公仔係最熱門嘅HelloKitty同Snoopy等，小朋友見到就眉開眼笑。
蘭西
電郵地址：
