市道好或不好，民以食為天這句話總錯不了，所以食界中有人辭官歸故里，自然有人像氹仔茶座的老闆阿強和Michael般漏夜趕食場，甘冒市道不景的風險，跑到深井去創業。能否賺取第一桶金還是未知數，兩個男人三十去創業，最大的資本是花得起的時間和勇氣，跌倒？使乜驚呀！
記者：邵超
攝影：伍慶泉、楊錦文
阿強
＊做美心快餐十二年被裁
＊開過泰國菜館，去過澳洲搵新菜
＊最後一次打工喺V-Mix
Michael
＊在澳洲念完酒店管理
＊適逢九七後經濟轉差，做過兩、三份與管理無關的工作
＊在V-Mix做到管理層位置
＊辭職做茶座老闆
跟氹仔茶座的老闆阿強初次見面，總覺得他有點眼熟，後來才想起他的神態有點像張達明。深井張達明是第二次創業，也算有點營商經驗，大談氹仔茶座的種種時口若懸河，原來一切由一隻紅雞蛋開始。
萬事起頭難，尤其是經營食肆涉及錢銀，阿強稱氹仔茶座沒有紅雞蛋，早就胎死腹中。這隻紅雞蛋並非食物，而是幕後一個「隱形」老闆的代號。
「初頭有幾個partner，臨開檔準備簽約時縮沙，當時真係好震驚，但已經無得返轉頭。好彩後嚟有一個做旅遊巴生意嘅朋友覺得我哋間舖都okay，出咗好多錢幫我哋。」
這個旅遊巴大股東不參與店務，也不願意露面，採訪當日差點可以見到他的真貌，始終緣慳一面，於是幫他改了一個花名為「隱形」股東。阿強稱經歷今次事件，明白到人窮志短，有些朋友只可以做朋友，並不能做好拍檔，但風雨過後大家仍是朋友。
阿強入行多年，行內朋友不少，當日與Michael毅然辭職，兩兄弟拍檔搵食，都有點「唔博點得世間財」的冒險精神。
「我哋唔係玩玩吓，隨便揀個地方開舖，事前做咗好多Research。」
他們研究過由麗城花園到豪景花園大約有一萬戶，靠近茶座一帶食肆較集中，單看鄰舖糖水舖已很旺場，而且聽聞政府會發展深井做旅遊區，及後這一列食肆會變成撐起太陽傘的露天茶座，相信生意亦會增加。如果眼前的阿強及Michael唔係穿上制服，差點以為他們是隔籬地產舖的職員，又或者係政府宣傳短片裏，大叫「呢度有好多機會㗎！」的演員。
始終是客路集中在住戶身上，Michael形容客路似玩笨豬跳，又好似玩過山車，午飯過後幾乎無人行過，反而愈夜愈旺。計仔多多的他們，特別安裝一部大電視，吸引球迷邊食邊睇波，大搞氣氛。
「呢度咁多競爭，勝在每間舖各有特色，賣嘅菜式都唔同，爭嘅係食物質素同埋服務態度……𠵱家已經有一定嘅熟客。遲啲可能同旅行社傾吓，帶團嚟食有優惠。」
今時今日，人窮志短可能適用於打工仔唔敢冒險去創業，但即使你有勇氣開舖，現在消費力下降，唔夠創意和誠意，亦好容易被淘汰。看見阿強和Michael咁有冒險精神，但願他們能成功，希望在人間嘛！
豬骨湯底落足料
賣相夠創意，雖然燶咗少少，但味道唔錯，Michael話麵包可以藏住不同的食材，海鮮就最夾。辣辣哋有股香味，原來咖喱汁有豬骨湯底，真係落足料。
葡汁雞汁鬥噴香
葡國雞配搭生果都幾新鮮，葡汁撈埋雞汁一齊煮，肉香和鮮果香味從椰青裏不斷飄出來，齋聞已經好鬼吸引。
脆夾香要趁熱食
九肚魚去咗頭尾炸成金黃色，再落埋個自調紅酒汁，脆夾香，同椒鹽九肚魚味道不同，但一樣要趁熱食至好味。
麵底滲滿海鮮汁
呢度幾款咖喱都唔錯，伊麵底用海鮮汁拖過，蟹身唔大但幾有肉，賣呢個價錢都算經濟實惠。
氹仔茶座
地址：荃灣深井村92號地下
電話：24917189
營業時間：12:00nn-2:00am（逢星期一休息，假日除外）