恒指升181點，大概好多人都估得好近旁，好多Call輪一開已經好高，到收市所賺嘅有限。
恒指昨日收市報9383，距離9千4相差些少。美國口氣已軟，美伊局勢如果再有緩和迹象，恒指上多三二百點問題不大。
和黃（013）升1.6元，升幅3.3%，隻末日輪9518食番鋪雙辣，由1.7仙飛上4.4仙，升幅159%，成為是日輪王。玩埋呢兩日，隻輪玩完。行使價49.60元，正股昨日又係49.60元，正股如果唔郁，隻輪變廢紙。
長實（001）亦都威威，收50.50元，升幅3.5%。但隻長實Call輪9680收50仙，只係升得3.1%，重少過正股升幅。隻輪7月到期，溢價5%，槓桿率10.1倍，數據靚，但唔肯跟貼正股上，大概因為市場人士對今次升市重有啲懷疑。
滙豐（005）上周五已升1元，昨日慢啲，只升50仙，輪到中銀（2388）升2.5%，收8.20元，威過晒所有恒指成份銀行股。
中銀Call輪9462冇跟貼正股，只升0.9仙，跟足應該升2仙，平水輪應該跟足。7月到期，現價9.4仙，溢價0.2%，槓桿率8.7倍。就算計埋中銀日後派息因素，都唔應該幾乎平水，買得過。
章盛