四十歲的盧志民，農曆年廿九與妻女開開心心吃罷團年飯後，計劃新春的拜年活動時，詎料，突然在家中猝死，遺下妻子及五歲的女兒，孤苦無依。新寡婦阿玉傷心欲絕之餘，亦為日後的生活感到前路茫茫。
「新年前幾日，佢重陪我去街市買生果同埋辦年貨，諗住初一去奶奶屋企拜年，佢平時都冇乜病痛，點知突然間乜都冇講就去咗，我哋根本接受唔到呢件事。」三十二歲的阿玉雙眼泛紅地續說，「啱啱我哋先搞完破產，佢重講好以後唔會再賭，諗住一家人慳慳哋開始新嘅生活，點知佢突然間死咗，我覺得好彷徨，𠵱家屋企又淨得幾百蚊，晚晚我都瞓唔到，好擔心冇錢交租同埋開飯，隨時要瞓街。」
阿玉在內地從事製衣廠女工，九五年獲批以短期外地勞工的身份來港任職餐廳侍應生，而阿民則在同一間餐廳從事水吧師傅，兩人情投意合，一年多後結婚，並誕下一名女兒。婚後，阿玉經常持雙程證來港照顧丈夫及女兒，生活重擔便由其夫負責。近年，他沉迷賭博，致債台高築，被迫於去年三月申請破產。
受經濟不景影響，他其後轉職水吧散工，每月收入不穩，經濟十分拮据。阿民是一個好丈夫及好爸爸，夫妻聚少離多，卻無礙二人的感情，每逢假日，他便會與妻女到就近的公園遊玩，接着便一起到街市買餸菜，一家三口生活樂融融。
「每個月我哋都好慳，有時買五蚊豬肉都會分兩餐慢慢食，平時連買生果都唔捨得，佢知道我鍾意食叉燒同埋燒肉，每次出糧就會即刻買畀我食；以往我唔舒服，佢又會照顧我，幫我煮飯同埋做家務；我唔識英文，阿民又會負責教囡囡做功課，成日講故事畀佢聽。」談及此際，阿玉再度落淚，不停用紙巾拭淚。
記者與阿玉談話期間，就讀幼稚園高班的欣欣對於父親去世的事情，看似十分明白。
她一邊向媽媽撒嬌，一邊手抱着心愛的豬仔毛公仔、滿臉稚氣地說：「呢個公仔係爸爸，爸爸走咗好悶，佢好錫我，成日買公仔畀我玩。」
刻下，貧困的阿玉，幸獲親友的援助替其支付亡夫的殮葬開支；為了日後的生活，她已向社會福利署申請綜援，有關申請尚在審批當中，有見她們的經濟苦況，蘋果日報慈善基金即時撥款四千元，助其應付膳食及雜費開支。
捐款編號：C0834
暖流熱線
電話：29908688
傳真：23702192
電郵：
網址：