美股反彈，港股亦跟隨造好，全日升181點，收報9383，成交61.62億元。雖然全球有近千萬人反對美國開戰，若因此而以為美國會受壓唔打伊拉克，股市出現反彈，其實係一廂情願嘅想法。美伊終須一戰，早開戰好過遲開戰，除非美國發覺無十足把握打敗伊拉克，又或者經濟不能承受開戰的後果，否則美國不可能放棄開戰念頭。
本港5大地產代理之一鴻運地產全線結業，又有2百人失業，連老閭田國強都話可能要申請破產。地產代理業近幾年的主要收入，已由二手樓代理業務轉為代理一手樓為主，今次鴻運地產結業，不但反映代理業務競爭激烈，更反映一手樓市場持續萎縮，根本養唔起咁多從業員。鴻運最終無被其他大行併購，可能反映業內人士對地產代理前景睇得十分淡。不過，少隻香爐少隻鬼，鴻運結業對上咗市嘅美聯（1200），可算係利好消息。
會德豐（020）出售名店零售業務畀吳光正，套現近6億元，刺激股價急升。會德豐今次出售業務，表面可為公司減債，但黑客話，此舉係會德豐部署將新亞置業（049）私有化。會德豐早有意將聯邦及新亞私有化，精簡集團結構，不過會德豐本身負債比率偏高，所以首先透過新亞將聯邦私有化，待會德豐有足夠彈藥後才將新亞私有化，所以今次焦點應該係新亞。新亞噚日收報2.875元，升0.05元。
粵海制革（1058）噚日勁升37%，收報0.30元。雖則話粵投（270）肯定可以成功將粵海制革出售俾廣東控股，但呢類關連交易，廣東控股通常會申請免提全購，即係話就算粵海制革股權以高溢價易手，但都唔會益到小股東，所以玩粵海制革時千祈咪搏命。
阿虎