車路士贏甲組史篤城，又一次打入英格蘭足總盃八強，領隊雲尼亞里賽後就透露，原來班球員喺足總盃特別醒神，都係皆因錢作怪。
車路士會長碧斯早前就已經話過球會唔會再好似以前咁大灑金錢，球員想同球會爭取加人工，或者係季尾續約，就要喺盃賽度有好成績。
「車仔」喺歐洲足協盃一早出局，𠵱家只可以爭足總盃，班球員自然特別落力。
我求大俠日前睇住「公仔箱」直播，對手雖然只係甲組護級球隊史篤城，但係見到前鋒哈索賓基同後衞拿索斯喺比賽時肉緊非常，果真重賞之下必有勇夫；列斯、新特蘭同富咸呢班英超財困球會，學吓嘢啦！
噚日近況回勇嘅湖人喺主場對東岸弱隊紐約人，我求大俠諗住湖人同高比仔近排咁勇，今次大多數實食冇黐牙，點知「巨無霸」奧尼爾突然因為菠蘿蓋痛，臨場決定唔打，搞到啲上盤客全部失晒預算；對手阿倫侯斯頓借勢創咗入五十三分嘅NBA今季新高，結果最後眼白白睇住湖人倒輸七分，見財化水，呢次真喺多得「巨無霸」唔少！
收費台今季重金搶得足總盃直播權，但唔知係好彩定唔好彩，半準決賽抽籤有阿仙奴對車路士呢場大戰，即係繼上圈曼聯對阿仙奴後，再多一場重頭戲碼去搵廣告及吸引球迷幫襯。不過再打落去，真係驚去到決賽分分鐘全甲組球隊對壘，咁樣到時就有可能係佢哋近年都有轉播嘅英甲升班附加賽，會比呢個決賽重精彩！
皇家蘇斯達補時階段因一個十二碼輸畀貝迪斯後，已經連續幾場比賽俾球證判「極刑」，教練丹路爾斯賽後話對近期屢輸十二碼唔感到意外，亦好隱晦講會放長雙眼睇皇蘇日後比賽有乜遭遇。近期西班牙一直傳有人唔想皇蘇攞聯賽冠軍，我求大俠對呢單嘢好懷疑，但皇蘇啲瓣數俾人睇晒，自己都要諗吓計仔啦！
朗拿度加盟皇馬已經有成半個球季，一批國際米蘭同巴塞隆拿球迷依然唔放過呢位喺佢哋心目中嘅「反骨仔」，計劃喺禮拜二兩軍對壘嘅歐冠盃賽事，聯手掛滿橫額抗議呢位巴西球星。我求大俠當然理解國米同巴塞球迷對朗拿度憎恨，如果皇馬之後打入歐冠盃八強或者四強遇到其中一隊，隨時出現翻版費高事件。