《信報》近年冒起的新專欄「原氏物語」再結集成書，已經係第三本，輯錄去年九月至十二月的文章，繼續由林行止寫序，深粉黃色薄薄的一本，八十元。八方曾經同作者原復生交過一次手，佢上一本書亦收錄本欄一篇稿。噚日收到佢寄來的新書，推介各位買番本細讀。
喺呢度介紹書，隨時會被人當鱔稿，但八方唔驚。第一，原氏文章真係好，自己都想搵佢幫《蘋果》寫番幾篇；第二，直至昨日前，八方咁八都唔知原復生係何方神聖！原來好多中環人都想起佢底，好幾次被人問到口啞啞，冇晒面。
噚日先知，原復生原來係蔡東豪，三十七歲，中學讀香港華仁，加拿大西安大略大學畢業，做過證券分析及投資銀行，九九年九月加入麥紹棠間中建電訊做執行董事，去年底轉投商台，最新動向傳佢會接替鄭丹瑞做營運總裁。
追蹤誰是原復生嘅工作終於告一段落，不過搵佢寫稿睇怕冇乜希望。
（圖）聽聞蔡東豪（原復生）會接替鄭丹瑞做商台營運總裁。
傳真︰2623-9278
電郵︰