地鐵主席蘇澤光劈炮唔續約，好多人都拍手掌，話佢夠吉士，寧得罪權貴也不自貶身價。而佢走埋，「高官俱樂部」尚餘兩個南灣街坊──施祖祥同任志剛，前者在貿發局人工唔算高，成績又好好，且又準備好退休，相信冇人會出小動作搞佢；至於任志剛，佢就惹火好多，但關係聯滙，要郁佢唔係咁易。
董政府頭五年受制於公務員，五年後問責制出台，當然要大展拳腳安插人馬。是故九鐵當時幾乎一個禮拜有一單醜聞放出街，直至楊啟彥主席一職被奪後始停止，蘇澤光看在眼裏，又點會唔知前途似「咁」！兩鐵合併，雖云研究，實已定局；而行政總裁同主席分開之議，在增強企業管治大前提下，實無從反對。但邊個做主席呢？人家當然心中有人，所以蘇澤光惟有出到最後一招。
權威人士話，蘇澤光表明唔介意公司分設行政總裁同主席兩個位，甚至唔介意做非執行主席，即係唔收人工，同田北辰現時在九鐵一樣。不過人家連你做義工都唔想，最多係畀你做阿二。楊啟彥前車可鑑，蘇澤光咪唔玩；又或者佢一早睇穿成個局，所以出隻義工牌。八方最想知係兩鐵合併後，搵邊個做主席？而呢個主席，又會否變成有人工之實職呢？
傳真︰2623-9278
電郵︰