《記者陳梅香、甄朝健順德直擊》蘇永康、李彩樺（阿Rain）、Twins同許志安，前晚去咗順德新城區德勝廣場做騷，大會免費招待約八千位觀眾入場，為咗確保藝人嘅安全，大會特別安排咗約一百三十個保安護駕。阿Rain果然「貴人出門招風雨」，一上台唱歌就落大雨，佢重變咗落湯雞。
當康仔出場後，台下嘅歌迷即刻高舉寫上「康」字嘅紙牌支持，佢哋重派利是畀康仔。康仔話農曆新年同情人節，都同老婆阿Jane喺新加坡度過，阿Jane重送咗藍寶石戒指畀康仔做情人節禮物。康仔新年期間因為簽證問題去唔到美國拉斯維加斯登台，佢話：「其實係簽證過期，我遲啲都會過去嗰邊做騷。」
康仔對於舊年喺台灣因為服食搖頭丸而要接受勒戒，佢話：「呢單嘢好多手尾跟，好彩朋友都好支持我。我羊年犯太歲，但我已經攝咗太歲。」
陳雅倫噚日三十七歲生日，佢前晚約咗五十個朋友去尖沙嘴搞生日派對，「壽星女」專登花咗約九萬蚊，買咗套Valentino晚裝同手袋扮靚靚。
陳雅倫同曾華倩前夫林肇基重攬實影相，陳雅倫話：「千祈咪話我哋有緋聞，我哋係識咗二十幾年嘅朋友。」
陳雅倫又話：「我嘅生日願望係希望今年好過舊年，身體健康。」
林熙蕾近日返台灣籌備拍第二本寫真集，今次佢會以健康同成熟嘅形象示人，佢話一定唔會露兩點。原來林熙蕾早前去咗意大利玩，之後就返咗去美國，所以佢借呢個機會日日去健身，務求到時以最弗嘅狀態示人。
許志安噚日以「馬拉松大使」身份，出席喺九龍彌敦道舉行嘅「二○○三渣打馬拉松起跑儀式」。安仔噚日朝早六點前已經去到現場，佢話：「前一晚做嘢做到凌晨兩、三點先返屋企，所以完全冇瞓過。咁早出街見到啲人啱啱蒲完個樣，覺得好搞笑。」
問安仔情人節有冇送禮物畀情人？佢話：「有心就日日都係情人節。」
陳法蓉上星期去咗廣州同深圳，拍攝電視劇《昨日夢魂中》，咁啱遇正肺炎病菌爆發，佢都要戴口罩防菌。佢話當地人搶住買白醋，連劇組工作人員都搶埋一份，老闆都買咗幾十支醋，日日喺片場煲，諗住可以殺菌。前日陳法蓉返到香港，先知道煲醋根本冇用，真係白費心機。
