靜咗好一大段時間嘅上海幫再次活躍，重要不鳴則已，一鳴驚人。小初舊年年底，其實亦收到風上海幫下一個目標係國潤控股（175），但等咗好耐都唔見郁手，於是冇再理，終於錯失一個賺錢良機。
小初當日收到風聲時，國潤仍在0.40元樓下徘徊，等咗好耐都未開車，上周一早市急升後，午市突然停牌，之後公布話同浙江吉利汽車搞合營，復牌後隻股最高炒上0.57元，小初惟有自歎走寶。
原本小初諗住隻股會回一回氣，諗住趁回吐先上車，點知隻股回吐幅度唔大，唔敢高追，同時亦可見呢班上海幫炒股夠晒海派。
經紀陳話，人哋剛剛至開始，上面重有大把錢排住隊落嚟炒，不妨伺機買番多少。佢又話，上海幫今次係有備而來，早排已經同本地幾間證券行打咗招呼，加上大陸炒家大把水，在雙劍合璧下，應該起碼重有一轉玩。
慕容小初