行內出名愛用靚女模特兒宣傳嘅李智康，過檔電盈後，第一次賣樓，就搞搞新意思，起用男模特兒行Catwalk，重喺外地挑選「型仔」模特兒，負責把守貝沙灣示範單位入口處。
蘭西問李智康點解要用男模，佢話男女平等喎！有靚女都要有靚仔，重反問蘭西佢地型唔型㖭？然後高興咁話：「我揀㗎！」至於揀選原則係高大威猛。李生講得冇錯，有謂牡丹雖好都要綠葉扶持嘛。
電盈今次請咗三名男模，兩位嚟自加拿大，一名係瑞典人，都係當地嘅模特兒，而且第一次嚟香港。其中來自瑞典嘅Johan年僅二十三，十七歲入行，主要喺歐洲各國表演，重識講少少廣東話，而嚟自加拿大嘅Martin，已入行三年半，另一位叫Jonathon。
對於香港嘅印象，三人都不約而同話幾好，計劃約滿後，會順道遊覽一吓。蘭西相信，電盈對三名靚仔一定不薄，佢地由朝企到晚，但一啲怨言都無，重同蘭西講，好滿意待遇㖭！
美記喺中西情人節兩日，送花同朱古力畀將軍澳維景灣畔買家，公司營業董事李志成向蘭西透露，有個客原本諗住情人節落訂，後來話要提前一日，但仍要求美記買一打玫瑰花，到時畀同佢一齊嚟嘅女朋友，浪漫得嚟都好慳家。為咗做生意，梗係照做啦。
個客最後買咗16座高層F單位，面積711方呎，未扣優惠價錢係264.1萬。聽講呢個兩房戶，係屋苑嘅樓皇。
另外，美記同事一個禮拜前call個跟咗四年嘅舊客，話維景灣畔有情人節優惠，結果即日落訂買咗個單位，跟住重租埋，新租客就係佢妺妺。
𠵱家宣傳新盤，真係少啲花臣都唔掂，只要有心思，簡單至一張傳單都可以好吸引。例如新地發展嘅鴨脷洲深灣軒，悄悄展開宣傳攻勢，包括向南區屋苑客埋手，每戶一封深灣軒宣傳信，內附一隻紙海鷗模型，可以簡易組裝。利用南區海灣常見嘅海鷗做宣傳，雖然唔及靚人靚景先聲奪人，但就平易近人得多。
長實長沙灣泓景臺國語版主題曲「我的驕傲」播到街知巷聞，反應好就自然要加碼，今次再請歌星容祖兒，主唱三分鐘嘅廣東話版，配合新一輯廣告。昨日喺泓景臺黃埔家居庭售樓處，重請嚟容祖兒出席MTV首播。套片喺飛鵝山拍，甚有自然氣息，不過容祖兒就話，拍攝當日天氣好凍，但出來嘅效果唔錯，辛苦啲都值得。
長實高級營業經理黃思聰就話，今次使費達七位數字，遲啲重會向睇樓客送廣告歌嘅CD。
佢話，之所以再次搵容祖兒唱廣告歌，主要係因為佢形象夠清新，可以配合年輕買家市場。蘭西噚日喺售樓處所見，在場歌迷大部份都係十多二十歲嘅年輕人，氣氛相當熱烈。
中半山麥當勞道11號，乃半山區豪宅新盤，參觀者非富則貴，待客之道當然小心講究，保安員特別有禮貌，不停向參觀者講多謝參觀，三樓售樓處除有飲料同小食供應之外，重有廚師即場示範炮製tiramisu，另外有音樂演奏同香薰介紹，等參觀者感受吓悠閒寫意嘅生活，如果對香薰有興趣，重可以隨便攞支番屋企紀念㖭。睇完樓成個人當堂高貴咗。
蘭西
電郵地址：
