去到先達睇吓今期又有乜嘢新機，當初都以為自己去咗三星個Showroom，因為個場一次過返咗3部新機，V200呢部重係有個鏡頭可以影埋相，計埋早前嗰兩部S300同T500，唔夠一個月就已經返咗5部機咁多。但話時話，行貨好似重係一啲動靜都無，莫非中文機真係比英文機難搞好多？人哋幾間大手機商都出盡法寶封殺水貨，莫非三星真係唔多介意？
文：羅新基
若然以內置鏡頭手機嚟計，怕且呢部應該係市面上第一部個鏡頭可以轉，擰嘅幅度有180°，除多咗影相功能外，其他功能都無乜點變，都係例牌嘅65K彩芒、雙屏幕、和弦鈴聲等，睇咗幾間舖，定價都係五千四、五，同Panasonic同Sharp嘅影相手機差唔多，不過可能係歐洲機，被當地嘅網絡商做咗手腳，上唔到WAP又Send唔到MMS，真係齋影相。
我羅新基身邊嘅一眾女性朋友，曾經被A400呢部QueenPhone而迷倒，而接棒嘅相信係呢部T500，機身繼續係紅色，不過厚度相當薄，只有17mm厚。無彩芒無遊戲，最多都係得16和弦鈴聲，佢嘅吸引力絕對唔係來自功能，而係佢討好嘅外形同$1,980嘅價錢，據啲舖頭Sales講部機超好賣，一晚賣成三、四部，以水貨新機嚟計算好好。
既然係三星機，65K彩芒、40和弦鈴聲、雙芒設計呢啲例牌嘢點會無，至於T400較特別嘅地方係鋁合金嘅外殼，拎上手都好輕身，開價三千九，以一部齋彩芒機無乜特別功能嘅機嚟講算貴。
雖則唔係S字頭，但同樣係來自韓國，Maxon嘅T688有40和弦鈴聲同7色來電閃燈，同其他品牌相比，功能唔算特別，但40和弦鈴聲總叫做優勝過同門嘅舊型號。
早幾日撞到阿M，佢向我羅新基大吐苦水，話買咗部SharpGX12唔夠兩個月就成日自動熄機，用咗無耐要整已經夠㷫，至火滾就係門市個Sales竟然話機裏面嘅記憶例如Game、鈴聲同啲相可能會無晒，部機成日自動熄，唔通唔整咩！到拎機嗰日，個Sales話啲記憶真係無晒，阿M大嗱嗱用咗幾十蚊Download啲JavaGame同鈴聲，唔見錢事少，無晒啲相事大，影唔番嘛！過咗幾日CS打畀佢話可以免費Download番啲Game喎！喺呢件事得到兩個啟示：第一，家陣啲手機又相又Game又和弦鈴聲咁多花臣，已經唔係整機咁簡單，係唔係要做Backup呢？第二，洗晒人哋啲資料又唔理，係咪等啲客再Download番啲Game再賺多筆呢？今時今日咁嘅服務態度點得㗎！邊個台？好似得一個台獨家發售呢部機咋喎！