對於國產護膚品，我一向沒有多大信心，要我試，NoWay！不過做女人最大的弱點就係貪新鮮同貪小便宜，好似當我日捱夜捱、面如死灰時，又知道有免費Facial做，話知佢用國貨，點都會走去試試。前幾日返深圳，我就發現有間新開的美容店，售賣自己品牌的護膚品外，更有免費Facial做，最緊要係無任何附帶條件，只要你肯試，佢就幫你做，而我當然發揮唔蝕底的本色，邊試邊同大家介紹，做完皮膚係點？唔話你知，總之就滿意啦！
記者：歐嘉荃
攝影：Alex
ImageGirl：Cathy
無錯！喺呢度做Facial真的一個仙都唔使畀，開業只有個多月的姿緣，所售的護膚品是自家研究的純中藥護膚品，而Facial所用的護膚品理所當然地使用自家品牌，乘機宣傳一番兼讓人客試用。而我抱住小人之心度君子之腹的心態，當然想知做Facial使唔使買護膚品，老闆陳先生居然答：「免費Facial是無附帶條件，我哋唔會迫人買護膚品，我相信只要有人肯試我哋嘅護膚品，有七成人會返轉頭買，況且唔試過的話，點知啲護膚品有真材實料，所以我唔覺得做蝕本生意，何況一個Facial唔係用得幾多錢！」果然豪氣！
每次做Facial，美容師都會根據客人的肌膚而作調配，好似經常化妝的Cathy，皮膚白得嚟又夠剔透，最好是補充水份同營養，所以美容師便幫Cathy做營養Facial，全個過程大約需要45分鐘。
毋須多講，做Facial當然要先清潔面部，然後蒸面，之後用營養霜按摩面部，按摩有助營養霜滲入肌膚。
利用超聲波儀器將營養精華素加速滲入皮膚，美容師話唔用儀器都得，可以按摩面部令精華素滲入，不過吸收得較為慢，用超聲波的話皮膚吸收會較快，亦會較好。
最後的工序當然是敷面膜，美容師幫Cathy敷個營養面膜，加速Cathy的血液循環，令到皮膚更富彈性，做完後會更加上妝，敷完後再搽精華素就大功告成。
Cathy：「覺得效果幾好，塊面即時出現光澤，美容師的手勢唔錯，舒服到我瞓咗覺，不過我嫌有陣藥味，嗅覺唔太好受。」
清潔一向是最重要的護膚程序，這兩支洗面奶便是店內的鎮店產品，亦已被國家發出配方發明專利。兩者含蘆薈、紅花等20種藥材，能一次過潔膚、去死皮、除黑頭及收細毛孔，唔使再用其他護膚產品都可以一次過滿足四種願望，我就覺得幾神奇，試完後，發覺只係用一粒米咁大嘅洗面奶就可以將塊面洗得乾乾淨淨，雖然有陣幾濃嘅中藥味道，不過我就覺得尚可接受。「由於洗面奶有排毒及去瘀作用，用完後皮膚會排出毒素，塊面可能會出現紅點，排完毒後皮膚就滑一滑！」老闆陳先生表示。妝淨露適合油性皮膚，而清潤露則適合乾性皮膚使用。
妝淨露（前）、清潤露（後）
容量：100ml
售價：各?99
「好多人出暗瘡都係因為油脂分泌旺盛、內分泌失調，再加上皮膚薄，所以咪成日出暗瘡，呢款痘無痕係專針對呢啲暗瘡皮膚而設，佢含有具清熱解毒的金銀花、冰片、連翹等製成，能將毛囊內的毒素排出，減少油脂分泌，大約用個幾月啲暗瘡就會完全清晒。」而我試用過就覺得有陣藥味，初時覺得幾難聞，不過被皮膚吸收後就無晒陣味，感覺幾爽。
容量：30ml
售價：?109
香港女仔一聽到有新的美白護膚品就必定會試，可能個個都深信一白遮三醜。一般的美白護膚品只是暫時性，好多時用完無耐就黑番，而呢套美白系列就根據中醫「透皮給藥、直接吸收」的原理，能行氣活血，將皮膚表層的黑色素化解，更有深層美白的作用，有助去除黑沉的膚色，聽老闆講，內裏含有人參、白芷、茯苓等中藥結合而成，美白效果持久兼且可以長期使用。
美白乳（前）
容量：50ml
售價：?85
美白精華素（左）
容量：30ml
售價：?117
克黑霜（後）
容量：30g
售價：?109
人人都愛美白，我覺得補水先至最重要，若果皮膚乾，幾白都無用，所以我一於睇睇啲補水護膚品，就好似呢系列的補水防皺用品就最啱經常坐喺Office嘅人，內含木瓜、麥冬、當歸等中藥成份，不但有極佳滋潤作用，更能養血袪瘀，令皮膚回復自然的光澤，效果唔錯。
補水滲透霜（左）
容量：30g
售價：?85
補水精華素（中）
容量：30ml
售價：?117
皺活乳（右）
容量：50ml
售價：?78
除了免費做Facial外，姿緣的另一王牌是妝淨露、清潤露這兩隻潔面奶。「呢兩隻潔面用品可同時清除黑頭、收縮毛孔、去死皮、清潔皮膚，唔需要另外再用收縮水、磨砂膏等清除皮膚內的廢物，因為咁我哋先可以申請到專利！」老闆陳先生說。
潔面用品攞到專利的確幾巴閉，問陳先生點解有興趣研發中藥護膚品，原來是睇唔過眼那些含鉛、水銀的國產護膚品。「我記得喺98年，當時好多人都瘋狂咁用國產護膚品來美白，見咁多人用啲有害產品，自己就諗住配製隻安全的護膚品，咁啱當時認識一位老中醫，我哋商量後便以中醫的理論，研製中藥護膚品。而做開美容生意的朋友梁小姐，對這護膚品極具興趣，所以我哋便一拍即合，創立了姿緣。我哋諗住以加盟店的方式開分店，希望國內每個城市都有分店外，重期望能打進世界市場，令外國人都認識姿緣！」
姿緣形象店
地址：深圳東門永新街南塘商業廣場B2?3至59號舖
電話：（86）75582251328
營業時間：10:30am?:00pm