雖然貼紙相機愈出愈好玩，質素重拍得住影樓，但奈何要真正影出好水準，通常都要交多幾次學費！加上好些貼紙相Size得粒豆咁細，重愈擺愈甩色。早於四年前，韓國就有一個具專業攝影水準、可即日取相、有嘢飲又有最新MTV睇嘅迷你照相館StarWallet面世，旋即就成為後生仔女嘅至In蒲點，𠵱家重有成二百幾間咁多。呢股韓風更喺三個月前吹到香港，於尖沙嘴登陸！
韓式相館特點係照顧周到，店內提供埋化妝品畀女仔執靚個樣，即使你化妝技巧麻麻，職員都可以幫手！
首先揀定鍾意嘅背景就可以自己擺Pose。不過喺呢度揀背景就可能比貼貼紙相多花啲時間，因為背景有150款之多。客人影相後可以睇睇韓國最新MTV，一面飲茶一面同Friend吹吹水，大約四十分鐘，就睇到靚相。Noel就同男友Steven試過，佢就話：「當初會有少少緊緊張！但去影貼紙相每次四十，𠵱家埋單百零蚊已經肯定有好效果，唔使自己博博吓，有信心保證。」
記者：李玉蘭 攝影：陳盛臣
地址：尖沙嘴加連威老道58號地下
電話：23698900
單人：$128（可擺4個Pose，有1張5R，10張2R及8張1吋貼紙相）
雙人：$148（可擺4個Pose，有2張5R，10張2R及16張貼紙相）
三人：$199（可擺5個Pose，有3張5R，20張2R及16張貼紙相）