劉德華及江華一直被指樣貌和舉動皆相似，兩人前晚難得同場演出，不停咬耳仔，十分投契。當江華和華仔並排合照及在台上演出時，他們的台風竟如餅印一樣，認真是名副其實的「麻甩版Twins」。
現年四十一歲的劉德華，與現年四十歲、近日憑無綫劇集《九五至尊》而人氣急升的江華，無論樣貌和舉手投足一直以來都很相似，前晚兩人應港台邀請，齊齊在沙田公園出席「喜氣『羊羊』賀元宵」活動。
華仔和江華甫見面即咬耳仔，而江華的太太麥潔文更用DV攝錄機，將江華及華仔傾偈的過程拍下。江華在台上表演時，亦不自覺地做出華仔伸手和揮手等動作，驟眼看還以為華仔在台上演出。
問到江華與華仔同場演出的感覺，他說：「你哋記者搞到我好緊張，係咪真係咁似？其實大家都係男人，有眼耳口鼻，我初初出道都有人認錯，但漸漸我個樣都開始成形。華仔係我好欣賞嘅藝人，佢好努力工作。話我哋似樣對佢都唔公平，每個人頭上都一片天，都係做番自己好，我都驚佢嘅fans唔鍾意。」
江華說：「囡囡有次見到華仔某次宣傳時，話嗰個人扮爹哋，我後來同囡囡解釋嗰個人係劉德華。」江華表示華仔亦讚他在《九五至尊》中演得不錯。
此外，大會前晚趁元宵佳節，公布與華仔最合襯的三位螢幕情人，分別是陳玉蓮、關之琳和鄭秀文，大會前晚邀請了陳玉蓮坐花轎到場，並與華仔手拖手合唱一曲，楊過與小龍女難得再度合作。被問到可覺江華是失散兄弟時，華仔說：「每個男人都差唔多樣，話佢囡囡都認錯，唔係啩？咁要問番佢扮邊個，扮劉德華呀？」
採訪：王連連攝影：陳偉權
