我一身黃衫出動，為咗參加呢個「TrafficLightParty」。「着紅色代表有Lover，NotAvailable；黃色代表有Lover，但Available；綠色代表係Single，DefinitelyAvailable」呢個準則我當然知，皆因紅綠燈派對在外國已經並非新事物，但儘管如此，這樣「擺明車馬」的玩意依然受吹捧，今晚中環Homebase就人山人海，插針不入。我穿插於四百個男女間，找找我嘅黃綠色獵物。但原來全場斯文蒲精，不敢張揚，穿紅綠黃三色嘅人少之又少，只低調地靠手上嘅絲帶發放訊息，但竟然一樣大有收穫。
記者：李玉蘭
攝影：林柏鈞 部份相片由被訪者提供
逢星期一、三、五刊出
綜觀全場，身穿紅綠藍三色衣服嘅人少之又少，好彩大會早有準備，提供三色絲帶畀大家揀啱顏色，表明身份，有冇機？就要先睇睇對方隻手！
呢兩個咁搶鏡嘅靚女，原來就係今晚紅綠燈派對嘅Host，Amy（左）：「我哋AQCommunicationsLtd有二萬人資料，年齡是二十多至三十多，男女比例各半，有七成在中環、金鐘上班，所以嚟Party嘅人都斯文啲。」而Peony（右）就提醒大家：「我哋會定期舉行唔同主題嘅派對，主要都同男女元素有關，規模由一百至七百多人，有興趣記住留意
本來滿懷希望，心諗呢個紅綠燈概念咁正，一定會係個又野又好玩嘅派對，誰不知全場OL同西裝友，個個戙篤企傾偈多過跳舞，氣氛明顯好麻麻，不過我都明，西裝友一樣可以心懷不軌。怕醜仔Anthony就最反映出呢種扮叉燒心態。
「我冇女朋友，但係帶綠色絲帶露我底牌就好瘀嘛，所以我今日專登打個黃色絲帶，扮晒叉燒值錢啲！我好怕醜，因為我覺得女仔好難追，連開口都覺得有難度，所以一向都唔夠膽主動識女仔！好彩今晚夠爆場，好多女仔，所以我咪係咁跟住朋友，見到佢問到女仔要卡片，我咪順便加口話『我又要』，結果響今晚咁多靚仔嘅環境下，我都成功攞到一張！咁少，都有啲唔開心，好彩𠵱家至十一點幾，派對開始咗兩個幾鍾，重有機會！總知今晚派對重有人，我都唔會放棄，一於留守到最後一分鐘！我二十一歲仔，重有大把機會。」
雖則話太斯文，但係場中實在不乏俊男美女，唔啱口味嘅自然閃埋一邊，滿場飛好雀躍嘅就一樣心滿意足，都算一表人才嘅Edwin就係如魚得水嘅一類。「有Party，當然執正自己！今日好迫，但係咁反而容易識人，我大約攞咗十二張卡片，有男有女。我做生意，都欣賞做生意嘅女仔，一來啱傾，二來獨立，我啱啱嚟咗一個鐘，未知係咪真係啱玩！不過呢個Party都幾高尚，多斯文人，所以都幾好玩！」
擺到明，今晚係OL同西裝友嘅天下，但係一眾玩得嘅型人都依然搵到開心，好似聲言想溝好多女嘅Russell就話：「歌好，Beer凍，朋友多，今晚傾偈好開心。」而成晚趕絕西裝友嘅綠Bra三人組，亦都話紅綠燈派對有諗頭，下次有人再搞都一樣參與。
人家落Bar搵獵物，抄得牌（抄電話）多以示戰績彪炳，但斯文的西裝友追女自有一套——攞卡片當抄牌，十足傾生意。兩粒鐘攞到十張卡片嘅Eric就來個即場示範。「我揀綠色，因為我DefinitelAvailable！今晚咁多人，多數白領，好斯文，想識人有幾難？」
對象：趕着離場嘅一名高貴女子
開場白：「Hi，我係Eric，你好！呢張係我嘅卡片，可唔可以要一張你嘅片？咁早走，唔玩多一陣？」
反應：只交換卡片，未有留低。
Eric心得：佢咁樣已經係拒絕！千祈唔好纏！如果有意思，佢會約你去第二間再飲，我跟住已經有三個約會啦！
人丁最單薄嘅當然係紅組，既然拒絕受溝，搞乜又唔返歸？Ken嘅理由係：「今晚咁多Auntie，個個扮到咁High，咁白鴿眼，點會啱玩？飲多兩杯先講啦！不過見咁多人來人去，咁搏殺，我都唔會阻人搵食，咪坐埋風口位，一邊同朋友頃偈一邊睇嘢，都幾過癮！」身邊朋友踢爆，佢唔打算識人，全因為心目中已經有個DreamGirl！
Russell同我一樣一身黃色，但係佢就大聲抗議：「我鍾意女人！我想溝女！我本來想着綠色衫，但只搵到黃衫，所以我咪着對綠色襪，無講大話㗎！點知啲人見到我着黃色衫就派條黃色絲帶畀我，搞到我成隻Banana咁！不過都無所謂，啲人太正經，好失望，好彩同自己朋友玩得好鬼開心，完全唔想四圍行識人！」
全場最多人係綠組，最搶肯定係呢三個綠Bra美少女！但令人好意外，佢哋唔受溝！「我以為今晚會好Wild，咪一齊着個綠色Bra，係Wocal，點知今晚個個都着到黑嘛嘛，好掃興！我哋着成咁有咩出奇？好似你去游水梗係着泳衣之嘛！」另一個插嘴：「都唔啱Feel，着晒西裝同我搭訕，我叫佢即刻彈開！So，我哋塵得起！」