歐冠盃禮拜二又開波啦！目前四組裏面以B組最緊湊，而呢組四支球隊都已經喺前晚踢過聯賽，出場陣容所見，佢哋真係留得嘅主力都留，總之就係為周二大戰鋪路。
好似將作客羅馬嘅華倫西亞，就收起咗安馬爾同卡萊爾，中場艾比達打後備；羅馬就有托迪打半場，蒙迪拿後備上陣踢三十分鐘，兩隊一齊揸流攤。不過華倫（威在半力比賽都贏馬拉加兩粒，羅馬就同客軍布雷西亞互交白卷。
同組迎戰阿積士嘅阿仙奴亦只係放前鋒亨利踢最後十七分鐘，而阿積士亦都一改喺荷甲聯主場數人嘅作風，只係險勝高寧根二比一，所以我求大俠話：你唔好低估阿積士班生牯仔容易衝動，原來佢哋好波之餘，重好有腦，隨時食埋阿仙奴隻車！
巴西球員除咗好波之外，而且重好有人情味，繼先前有李華度話向AC米蘭推薦好友皇馬中場干斯卡奧後，朗拿度又話希望波爾多老友沙維奧可以回巢。我求大俠心諗阿哨牙度你咪咁天真，因為你唔明白點解沙維奧會俾皇馬借咗出去，就係因為皇馬要籌錢搵你番嚟。𠵱家你喺皇馬重未係成功，最好唔好講咁多嘢，練好啲波先啦！
利華古遜上周六又喺德甲聯賽主場輸畀羅斯托克後，會長卡文特睇到扎扎跳，會方終於炒咗教練托比慕拿，連歐冠盃迎戰紐卡素都唔使佢帶隊，對呢位上季德甲最佳教練得主嚟講，認真大打擊。利華古遜今季冇咗波勒同薛羅拔圖，主將又個個傷，的確好難搞，但係𠵱家成績咁差又好難畀托比慕拿教落去，我求大俠惟有祝佢快啲有班落啦！
有人話葡萄牙波易估，但係隨時就因為咁中伏。前晚葡萄牙班霸波圖作客讓馬里迪莫半/一，結果輸一比二，破咗不敗身。我求大俠心諗，捧波圖上盤已經「勾勾哋」，因為季初至季中一輪搶分後，佢哋已經拋離好多，而且過去三周佢哋已經輸過兩個盤，重要爭足協盃，呢次開下盤真係有迹可尋，反而另外兩支追緊上嚟嘅強隊賓菲加同士砵亭嘅上盤就穩陣啲。
韋斯咸門將占士今季真係問題多多，球場上就抵擋唔住對手射門，球場外亦抵受唔到誘惑，背住老婆同舊女友互通電話同電郵，重喺上個禮拜打完英格蘭對澳洲場友賽向舊女友訴苦。據占士好友講，呢位國家隊門神都係唔想拋妻棄子，但又唔捨得舊相好。我求大俠就勸占士快啲決定，專心幫韋斯咸護級重好啦！