政界同演藝界有時都幾似，為咗爭取曝光率，時不時要搞吓新花樣。好似立法會議員朱幼麟，前幾日已經事先張揚，會以飛天儀式降落沙田，象徵「空降」立法會新界東選區。
咁又難怪，飛天朱今屆出線嘅「選舉委員會」組別，下屆會正式取消，明年要保住立法會一個席位，投身直選已經無可避免。加上佢選擇新界東，即係要硬撼劉慧卿，冇新噱頭點得，不過沙田好似冇乜風，連風箏都飛唔起，飛天朱惟有重金由歐洲購買最靚嘅器材幫手。
卿姐有乜對策呢？八方問卿姐時，佢正企喺旺角街頭搞緊論壇，忙到成頭煙，一聽朱幼麟會飛落沙田，就冇好氣咁話由佢飛到夠，自己唔得閒諗噱頭還擊，只識正正經經攞啲政績、紀錄出嚟，由選民決定投邊個票，不過卿姐都慨歎，自己嘅競選策略成日俾人話悶到抽筋。唔知大家有乜好建議呢？
傳真︰2623-9278
電郵︰