座枱鐘，無論大大小小嘅Size，相信每個家庭都會有一兩個。現時嘅摩登家庭選購產品愈趨時尚有創意，日本設計嘅座枱鬧鐘就大玩Cutie款，卡通人物就最能討好；另一邊廂，玩晒金屬Look嘅歐美時鐘，亦令一班年輕人雀躍搶購。據一間專售日本潮流玩意嘅店舖老闆Alan稱，由於今年推出嘅座枱鐘甚為奇特有趣，所以年輕一輩嘅朋友，送座枱鐘畀人都唔怕「唔老黎」！
記者：梁煒健
攝影：陳偉強
6年前開設第一間日本潮流精品店「JCShop」嘅老闆Alan，雖然只得29歲，但時至今日就已有多間分店。Alan經常去日本入貨，「我不但喜歡日本設計嘅古靈精怪鐘，其他國家產品都喜歡，只要靚及Cute就得；正如年多前去到上海，就買咗一個樣子一派正氣、但手FingFing嘅毛澤東座枱鐘，真係好盞鬼㗎！至於我嘅至愛，必屬《反斗奇兵》入面嘅巴斯光年機械人，總之係Product就會買，即使外形差少少，去到日本見到我必定掃貨。」
據Alan稱，每年一月，日本方面就有最多古靈精怪座枱鐘推出，一年約有200多款，分兩批推出。問呢幾個月邊款鬧鐘賣得最掂，Alan就答：「最新一款會發聲又識着燈嘅高達座枱鐘賣得最厲害，唔夠兩個月就賣走250個。顧客以年輕女性較多，主要買嚟送畀男朋友。𠵱家送鐘唔會再計較，百無禁忌。」
剛於上月推出市面嘅兩款卡通人物座枱鐘，一款係米奇老鼠，另一款則為叮噹──多啦A夢。呢兩個座枱鐘除咗有響鬧功能之外，重有乜特別？若放好4枚AA電芯喺底部之後，按着車頭頂嘅圓掣，米奇及叮噹均會兩邊搖周身郁，而兩架車亦不停前後搖動，好鬼趣怪！
每款$598（JCShop）
由日本入口，但實際係香港設計。肥豬仔及黑眼狗仔背部可插放卡片，兩者嘅尺寸為5吋長、4吋高及2.5吋闊。每按一下兩者眼部或鼻部嘅右端「Talking」掣，就即時有真人以英語發聲報時，而按左邊掣的，就會定時以狗仔呔聲作響鬧，係咪好吸引呢？
每款$150（EI）
由日本Luft廠設計嘅Mr.Leg枱鐘，特色係座枱鐘主體以美國桌球波及電視作設計，加上兩條長長幼腳，雖然企唔到起身（企起約9吋），但公仔雙腳交叉踏腳而坐，特別生鬼。
每款$138（JCShop）
一見個地球可以凌空懸掛，就知佢係玩浮磁，以磁石令物件浮起。其實下面嘅LCD鐘毫無特別，但因上面玩晒凌空懸掛及以螢光色示人，好有Cyberfeel。
$698(JCShop）
由荷蘭著名家具設計師PetervanderVagt所設計，荷蘭名廠KARLSSON代為出產，由於採用真空管燈泡製成，內裏嘅跳字時計均能準確地顯示。雖然只得時、分、秒計算，但因為用咗真空管燈泡，地座又以全金屬製成，故售價唔平。此鐘嘅尺寸為8吋長、4吋高、3吋深。
$2,300（EI）
荷蘭名廠KARLSSON嘅作品，但鬧鐘依舊用番之前用一枚AA電芯嘅機芯，準確性一般。亦因Design夠獨特，可憑一條幼鐵線支撐鐘身及地座，可以隨意擺動Fing鐘球，頗有趣味性。由於呢盞座枱鐘有成18吋高，屋企冇番咁上下時尚，就幾難襯到佢。
$280（EI）
KARLSSON出產嘅座枱鐘設計十分簡潔，鐘表一般以黑白為主，冇乜花巧，只會喺外形上及功能上加添。正如呢個圓形小鐘，外形平凡，但因可以有角度調校，而且有如天線一樣嘅伸縮功能，最長可拉至12吋，擺喺床頭就至啱用。
每款$290（EI）
歐洲品牌KIKKERLAND出品，外形有點似汽車倒後鏡，但主要係鑲在睡床邊嘅牆身上。由於有球形關節接位，所以可作350度調校角度，鑲在牆身後，可以從任何角度睇時間，亦有響鬧功能。呢個鐘雖然以電鍍塑膠料製成，一樣做得好有金屬感，約高6吋。
$170(city'super）
店舖一覽
JCShop（31022783）
地址：銅鑼灣時代廣場8樓833號舖
EI（25742299）
地址：灣仔摩利臣山道34號地下
全線city'super
查詢電話：24298588