左丁山每次來回機場，都係坐機鐵或者巴士、私家車，從來冇坐過的士，因為覺得的士太貴，巴士票價只需二十蚊，為乜事要搭的士喎。
工程陳就唔同，經常坐的士。呢日大家到FCC食飯，講開工程生意競爭激烈，利錢極薄，甚至要蝕少少都要搶，否則難以維持門面。中小企確係經營困難嘅，好彩工程陳間公司歷史耐，有底子，𠵱家重撐得住，等待嚟明。
工程陳話：「我哋經常被逼減價，但的士原來唔可以減價，上星期我喺曼谷返嚟，一如過往，call咗間的士接我返天后廟道，的士司機一路嗌死，話唔夠生意，佢哋想話申請減價，但政府唔畀喎，點解廖秀冬呢邊話巴士有減價空間，嗰邊又唔畀的士減價呢？」
咁高深嘅問題，唔識答，恐怕成個政府都唔知想做乜，經常自我矛盾，自打嘴巴。機場的士咁多，的士排隊要排幾個鐘頭，工程陳點解要call的士呀？工程陳話：「你唔識㗎喇。的士排隊咁耐，自然要照表收費，冇價減。我有三個的士台電話，問佢哋有冇的士載客到機場，順便接我返銅鑼灣。嘻，次次都有，折扣多過八折，赤鱲角到維園只需二百六十蚊，你要，就畀電話你。」市場定律便是如此，政府唔畀的士減價，的士司機就自己私底下減價，點捉到佢哋吖。不如索性全部公開合法地減價，譬如起表價減到十二蚊。三四個人搭短程，夠晒便宜，亦益到司機有生意！