渣打馬拉松花絮

日大學生自費參賽
噚日七位來自日本嘅選手喺不同組別闖入三甲，原來佢哋都係來自本州富山縣高岡法科大學，其中奪得半馬拉松女子公開組冠軍嘅菱木河子話，佢哋二十二人參賽，有近三份一跑手攞獎都好滿意，因為香港賽道多上斜，天氣又潮濕。重有係佢哋都係自費來港，咁熱心真係抵讚。

西隧長命斜最蝦人
大會噚日沿途安排咗好多啦啦隊為跑手打氣，佢哋見跑手經過都會大叫「加油、努力」，特別係喺西區隧道口嘅啦啦隊，因為西隧出名長命斜，空氣又唔流通，冇佢哋打氣，可能好多跑手都捱唔到終點。

亂拋垃圾失禮死人
跑手衝過金紫荊廣場終點後，大會都會派保溫錫紙同清水畀佢地，不過部份跑手嘅公德心就麻麻，將用完嘅錫紙同水樽亂拋地上，搞到會場好多垃圾，話晒廣場都係遊客區，真係失禮死人。

跑完趕啱睇升旗
喺朝早六點九率先展開嘅十公里比賽，大約八點鐘好多跑手都完成比賽到達終點，適逢警察主持升旗禮，好多跑手都霸番個位睇升旗，既有得跑步，又有得睇升旗，真係一舉兩得。