即將拆開做「櫻花組」同「乙女組」嘅Morning娘（晨女），近排經常傳出負面新聞，基本上純情形象都蕩然無存。難得佢哋自己都見怪不怪，做節目講嘢愈嚟愈口沒遮攔㖭。
晨女日前錄影電視節目《Hello!Morning》，佢哋兩個人一組，搞咗個「史上最大Cosplay大賽」，隊長飯田圭織同高橋愛扮「高矮兩師生」，吉澤瞳同小川麻琴就扮日劇《從北國而來》嘅兩位老人家，至於矢口真里同加護亞依就扮「鹹濕醫生俏護士」，重有就係得到全晚大獎、由石川梨華同新垣里沙所扮嘅「旗袍夢露配鹹濕日本佬」。
晨女四對組合分別出場，個個都出盡力扮猥瑣扮老積，當中「洋妞」石川梨華係咁俾人調戲，重俾人話佢裝「胸」作勢！矢口真里又爆肚話：「俾阿媽見到我咁嘅樣就慘囉！」到咗最後，連主持中澤裕子都笑到肚痛咁話：「你哋掉晒羞恥心落海囉！」