GBA雖享有手提機霸主嘅美譽，可惜其過暗嘅屏幕令一眾機迷有所不滿，好多Game打起上嚟零舍矇查查，卒之就Hit咗款AfterBurner背景燈配件，生產商同改機師傅都賺個不亦樂乎。任天堂梗係唔會睇住肥水流入別人田，而GBASP就改良咗GBA亮度不足嘅問題，而外形設計更似足個鏡盒兼擺喺情人節嗰日推出，明顯係藉此吸納一班女性玩家。
記者、攝影：徐影龍
ImgaeGirl：Natalie
新機名為GameBoyAdvanceSP（以下簡稱GBASP），普通版準時喺情人節抵港。GBASP外形突破舊有框框，首度採用摺合式設計，好處係摺埋時機面面積只有82×84.6mm，極為小巧，放喺衫袋、手袋甚至掛頸都冇問題。另一好處係唔玩時避免刮花屏幕，啱晒粗心大意嘅機迷。唯一要彈係摺埋部機之後，電源唔識自動關閉，加上唔似MD般設有Lock掣，女士放喺手袋好易開着機都唔知，又唔可以即時買電補充，呢點可算較為失策。
GBASP另一重點改良，就係安裝一組光管喺LCD背面，解決屏幕太暗嘅問題，效果亦同之前Game舖幫人改裝嘅差不多，分別係唔可以調校光亮度，不過勝在品質上有保證。目前一共有3款顏色GBASP，幾乎可以肯定嚟緊會陸續推出更多顏色機殼，等大家可以襯番屋企部GAMECUBE。
除外形及屏幕背景燈外，GBASP硬件規格基本上同舊型號一樣，可兼容所有舊Game，處理器及記憶體並冇任何升級，不過就首度採用充電式設計。採用鋰電設計有利亦有弊，好處係令使用時間延長，官方公布開啟背景燈約可操作10小時，而關閉的話更長達18小時，比「AfterBurner」更㩒用。而壞處係補充上有難度，電源耗盡惟有等到返屋企再充電先有得玩。專用鋰電內置喺機內，需配搭跟機嘅充電器作充電，要注意係跟機火牛並非世界性電壓，需另接變壓火牛充電，否則隨時落得燒機燒火牛嘅下場。
SQUARE跟任天堂重修舊好後，首個重頭作品就係同期推出《FFTADVANCE》同綑版，入面除咗一部靚到飛起嘅珍珠白GBASP外，重有SQUARE招牌作《FFTADVANCE》、官方指南書、特大海報、黑色絨布袋等，最為吸引係條金屬掛繩，以透明膠包住一條金屬鏈，加埋個《FFTADVANCE》膠牌仔，同部珍珠白GBASP出奇地襯，拎出街玩肯定引嚟唔少豔羨目光。同綑版咁大堆頭，加上日本都唔夠貨賣，價錢當然唔平，推出前曾有Game舖預計會炒至十算，即原價18,000日圓要成$1,800蚊港紙，幸好正式到貨日好多機迷抱觀望態度，稍為遏止一下炒風，現售價約為$1,598，灣仔DreamStore加送屏幕保護貼及變壓火牛，不過就冇耳筒轉換線。
處理器：32bitRISC-CPU＋8bitCISC；
屏幕：40.8×61.2mm（32,000色）
電源：內置專用鋰電池；
使用時間：背景燈開啟（10小時）?關閉（18小時）
體積：84.6×82×24.3mm；
重量：143g
$1,198
雖然GBASP喺機能上並冇太大提升，兼且賣價又比日本貴，不過Game舖現場亦有好多人問價及試機，一時間Game場又再熱鬧起來。據店舖老闆講，好多人本身有GBA都會買新機，而3款顏色GBASP要算銀色最受歡迎，亦最早賣斷貨，其他配件如耳筒轉換線亦已經斷貨，就算較貴嘅《FFTADVANCE》同綑版，50套亦喺1日內清晒貨。
售賣點：DreamStore
地址：灣仔東方188商場256號舖
電話：25753285