東區區議員王國興噚日第四百次向市民滙報工作,呢位民建聯嘅黨友咁勤力,年底又到區議會選舉,黨主席曾鈺成點都要捧場以示支持,重拉埋立法會議員兼「北角地膽」蔡素玉一齊去。
蔡素玉做區議員可能唔及王國興咁勤力,不過北角咁多福建鄉里,蔡素玉即刻轉用福建話同大家拜年,咁又冧掂啲街坊。有個同鄉阿伯用鄉下話問蔡素玉,由北角去到紅磡火車站點樣搵扶手電梯出閘!雖然問題幾無厘頭,但玉姐手口並用解釋一大輪,阿伯都好滿意。
除咗做「街道大使」,蔡素玉下個月重會去南韓同台灣睇垃圾。唔好笑,佢真係好認真咁去考察當地回收處理「濕垃圾」嘅經驗,所謂「濕垃圾」,即係廚房嘅餸尾、菜汁,回收再造都可以成為賺錢嘅商機。
﹙圖﹚王國興(右三)向市民滙報工作達四百次,好似重勤力過黨主席曾鈺成(右二)同蔡素玉。
傳真︰2623-9278
電郵︰