鄭中基與楊千嬅的戀情經歷幾番波折，雖然近日盛傳二人已經舊情復熾，鄭中基早前更公開承認有意與千嬅復合，惟千嬅卻指仍未是適當時機。不過，前晚情人節千嬅竟應約與鄭中基一起品嘗麻辣火鍋，看來鄭中基與千嬅復合有望矣！
前晚是一年一度的情人節，圈中一雙一對的情侶亦紛紛出動慶祝，而近日盛傳已復合的鄭中基與楊千嬅，前晚亦雙雙到九龍城輝哥火煱撐枱腳，共享溫馨。儘管昨日鄭中基矢口否認前晚陪千嬅晚膳，但千嬅卻落落大方承認與鄭中基共度情人節。
男方死口唔認約會
前晚九時半左右，有人目睹千嬅與鄭中基的保母車齊齊在九龍城輝哥火煱附近出現，據知鄭中基為港台在中文大學舉行的「人間定格訂情音樂會」表演完後，即趕往九龍城陪千嬅食麻辣火鍋慶祝情人節，然後再到商台代替吳君如與杜汶澤一起主持《嘩嘩嘩！打到嚟！》節目。
不過，鄭中基昨日接受電話訪問時，卻否認前晚與千嬅晚膳，他說：「我噚晚只係同杜汶澤去輝哥食飯，坐低傾吓做節目嘅嘢，前晚向生同向太（向華強夫婦）都喺度，但就冇約到千嬅，唔信你問吓阿澤吖！」
港台騷被嘲死人妖
而鄭中基前晚在港台活動上，自爆已買了朱古力想送給千嬅，可惜因沒有機會碰面而未能成功送出禮物。鄭中基說：「我買咗幾盒朱古力，準備送畀幾個朋友，但其實冇乜特別，好似萬聖節都會送糖，聖誕節都會送禮物啦！」而前晚鄭中基在台上演出時，台下竟有人大叫「死人妖」，但鄭中基表示未有聽聞，不過他說：「冇所謂啦，咁即係證明我喺《行運超人》嘅角色成功啫！」
這邊廂鄭中基矢口否認跟千嬅共度情人節，那邊廂的千嬅卻大方承認前晚與鄭中基一起打邊爐。
千嬅昨日在電話中說：「其實係杜汶澤想叫我做電台節目，所以約我出嚟食飯傾吓，唔係鄭中基約我嘅，阿澤重話鄭中基都喺度，問我介唔介意，我覺得同朋友食飯怕乜嘢啫，而且，除咗我哋三個之外重有一個朋友，四個人一齊打邊爐，向生同向太（向華強夫婦）咁啱喺隔籬食飯，佢哋都有走過嚟同我哋打招呼。雖然噚晚日子好敏感，但我覺得食餐飯冇所謂，唔需要避忌，如果真係要慶祝情人節，都會揀去Amigo餐廳食燭光晚餐啦，又點會同成班人去食飯吖！」
向太收萬支花
而在輝哥歎火鍋慶祝情人節的向華強夫婦，前晚約九時半離開，記者問向太可有收到向生送出的情人節禮物時，向太心情甚靚地說：「九千九百九十九支花囉，搞到一屋都係花！我送番乜嘢畀佢？咪送個心囉！」
此外，昨日台灣有報道指鄭中基日前曾特意致電台灣方面的環球唱片公司，要求對方特別照顧昨日赴台工作的千嬅。不過鄭中基面對台灣高層質問時，仍死口否認千嬅是其女友，只表示二人同屬一間唱片公司，所以才希望台灣方面多多照顧對方罷了。
採訪、攝影：娛樂突發組、陳月媚、蔡如玉、胡比
