早前，亞Mark曾經同大家介紹過，一啲將會響2003年到港嘅新車，相信唔少讀者經已心中有數，知道嚟緊應該點選擇；不過，最近亦有讀者問亞Mark，話除咗新車之外，如果想買二手車，響2003年又會有乜嘢好選擇呢？呢個問題雖然有啲刁鑽，但既然大家有要求，亞Mark就破天荒，列出幾款值得大家響今年購買嘅二手車，不如𠵱家就嚟睇吓有邊款啱你啦！
記者：Mark哥
講到日本2.0公升級車款，以往二手BestBuy，亞Mark一直認為係三菱GalantVR-M；但響今年，相信2.0公升級日本車BestBuy嘅地位，應該會由一批七人車所取代，而當中最值得注意嘅會係日產Prairie。事關喺2001年推出嘅Prairie，已經開始響二手市場上出現；另外，由於喺2002年10月嗰陣，代理曾經以$145,000嘅超值價推售，因而令Prairie𠵱家嘅二手叫價，被拖低至約11萬元左右。至於豐田Picnic，因為以特價推售嘅車輛數目只有50部，所以二手叫價好快就回升到14至15萬元嘅水平，故此日產Prairie會來得更見吸引。
若然你正諗住買番部1.5公升級家庭房車代步，而預算車價係10萬元左右的話，不妨考慮一下2001年嘅豐田Corolla同本田Civic喇！因為呢兩款炙手可熱嘅家庭房車，亞Mark相信經過3年時間，已陸續進入Facelifted期，其中Corolla更已推出Facelifted新版，所以二手叫價亦開始變得吸引；加上車內設備又完全唔落伍，就以豐田Corolla為例，絕對稱得上係裝備齊全，甚至勝過上一代Camry，而本田Civic嘅VTEC引擎、CVT波箱及平地台設計，亦都非常吸引㗎！