張可頤入行至今，一直十分低調，除了早期與宣萱鬧不和，以及跟陳容森拍拖一事曝光外，平時很少在報章上見到她與合作的男主角傳緋聞，與今時今日電視圈內某些靠緋聞上位的姐仔不同。
張可頤對此說：「講真，我唔係好欣賞呢一代新晉嘅幾位女仔，如果我係老闆，梗係希望員工擺全副心機喺做嘢度，而唔係搞呢樣，搞嗰樣，去製造新聞講自己。
「入行以嚟冇緋聞，講真嗰句係要視乎你擺出嘅態度，會唔會令人誤會。你想道門虛掩、閂咗、定係大開，呢啲要自己控制，你唔好話我知，唔知點樣控制囉，可能𠵱家好多女仔鍾意挑戰自己同埋個男主角，但喺我字典入面，工作地方就係工作，好似嘟嘟姐（鄭裕玲）、肥姐（沈殿霞）咁有辦你睇，佢哋唔會有呢啲嘢㗎，但都咁有成就，呢方面我會仿效佢哋。」
張可頤小學畢業後便赴英國留學，難免有俗稱的「鬼妹仔」性格：率直、獨立、做人欠圓滑，令人覺得頗難相處。
張可頤說：「其實我好易相處，冇錯我初入行時的確幾乞人憎，港姐應該嬌滴滴，但我偏偏男人上身，唔識顧人感受，但呢方面我有改進。與此同時，同我相處得耐嘅同事會慢慢了解我，而我又改啲，𠵱家大家相處得好好，好似啱啱拍完劇集《金牌冰人》，同馬浚偉、蓋鳴暉等好好朋友，呢方面我幾開心。」
