繼德國平治車廠響較早前公布咗，佢哋響2003年1月嘅汽車銷量數據後，份屬同鄉嘅寶馬車廠，亦於日前公布咗1月份汽車銷量數據，成績亦令人感到滿意。從廠方公布嘅數字中可以睇到，整個寶馬集團喺2003年1月共售出79,900部新車，較2002年同期嘅77,800部多出2,100部，升幅達2.7%；當中尤以新款Mini嘅走勢最為強勁，整個1月共售出15,100部新車，較去年同期嘅7,740部多出接近一倍，能有如此佳績，都係拜新Mini已響多個主要市場正式推出所賜。
話雖如此，但寶馬旗下車系嘅銷量卻只有64,800部，比去年同期70,070部下跌7.5%，廠方認為有如此成績出現，係因為旗下多個車款已到達轉款期，導致用家購買慾下降有關；但全新7系卻較去年同期有明顯升幅（高達12%），響1月合共有4,370部新車交到用家手上，成績絕能令人感到滿意。相信當寶馬旗下多個車系於今年相繼推出新版本後，全年嘅總銷量定會更勝去年呢！