台灣組合F4前晚情人節喺馬來西亞舉行巡迴演唱會最後一場，雖然現場有嚟自東南亞其他地方嘅歌迷嚟捧場，但反應竟然未見踴躍，入座率只有六成，都算係有頭威冇尾陣！
除咗入座率失威外，佢哋嘅演出水準亦時好時壞，唔知係咪因為佢哋成日飛嚟飛去太過疲累，當佢哋面對熱情觀眾時，竟然唧都唔笑，好明顯不在狀態。
佢哋四個合唱嘅時候，已經有走音情況出現，但勢估唔到夾口形都夾到甩嘴，尤其係言承旭獨唱嗰陣，竟然頻頻甩嘴，搞到部份觀眾好唔滿意，事後大呻搵笨。與此同時，亦有歌迷覺得佢哋成晚講嘢多過唱歌。不過，F4始終有佢哋嘅魅力，如果唔係都開唔到咁多場巡迴演唱會啦！
梁詠琪（GiGi）做咗香港保護遺棄動物協會大使，重幫協會設計領養證書。GiGi除咗令該會嘅探訪被遺棄動物人數同募捐數目上升外，重帶挈埋早前同GiGi合作拍攝宣傳照嘅唐狗Ellie，Ellie已經覓得好人家收留，搖身一變成為富貴狗！
GiGi知道呢個消息後，表現得好興奮，佢日前話：「今次幫到隻狗好開心。其實大家應該珍惜自己嘅寵物，唔識得欣賞就唔應該將佢哋買返屋企。」
江芷妮噚日以一身性感打扮，出席喺灣仔會展舉行嘅美白產品活動，佢話之所以被睇中做美白產品代言人，全因為拍得多旅遊特輯，皮膚曬到好黑，合晒資格做美白同減肥療程。
江芷妮話：「今次有接近七位數字酬勞，又可以免費減肥，真係着數。」
任港秀同陳穎妍噚日喺旺角拍攝電影《江湖篇之金牌打手》，任港秀重特登為呢套戲剪咗頭短髮，問任港秀情人節點過，佢就話返咗教會。
反而陳穎妍一提到情人節就好開心，佢話：「今年情人節好開心，因為男友送咗隻鑽石戒指做禮物，咁我都送番袖口鈕畀佢。」
港台DJKawaii噚日去屯門做「戀LoveLove大派對」司儀，有位癡心女fans專登到場送戒指畀佢，原來呢名fans追隨咗Kawaii半年，佢手臂度其中有個心形紋身，上面重有Kawaii個名㖭。
Kawaii話：「佢試過拎啲金飾同我求婚，我當然拒絕咗，朋友教我有慈善活動時，就拎嗰套金飾嚟做善事。」
