唔知NBA係唔係有心靠害，竟然編排咗馬刺最近要連續九場作客，真係唔俾人打殘都俾NBA玩殘。不過塞翁失馬，焉知非福？NBA今次竟然「黑心做好事」，造就馬刺創咗NBA史上最長嘅作客連勝紀錄！
噚日馬刺喺連續第八場作客對湖人時，雖然無咗大衞羅賓遜助陣，重要俾最近「弗到漏」、喺過去七場平均獨取近四十分嘅高比仔狂入咗四十四分，但係最後仍以八分打敗湖人，贏波又贏盤；加埋佢哋之前除咗第一場輸咗畀木狼後，連續贏咗嘅六場作客賽，馬刺剛好刷新咗NBA作客連贏七場嘅新紀錄。
相信球迷𠵱家最關心係到底馬刺可唔可以喺禮拜一朝早再下一城，贏埋最後兼連續第八場作客賽呢？我求大俠都有啲保留，因為對手係勁旅帝王，惟有祝馬刺好運啦！
噚日Reebok宣布退出拜恩爭奪戰，理由係高比仔開天索價。不過高比仔話喺佢本人覺得Reebok嘅風格同價值觀唔適合自己；換言之佢一定過硬Nike啦！其實高比仔今次叫價高達每年九百萬美元，所以adidas最希望見到Nike將啲錢用晒嚟簽高比仔，因為咁樣佢哋就有更大機會爭贏高中球王勒邦占士。
今晚富咸喺足總盃對般尼，前英格蘭二十一歲以下國腳哈利將負重任。佢為咗操弗啲，最近成日搵佢嗰隻愛犬托比（斯塔福郡牛頭㹴'StaffordshireBullTerrier'）幫手練跑，話會幫到富咸。我求大俠聽講呢種狗骨骼強健，有強大運動體力，唔知係咪真係幫到富咸嘞。
國米韋利喺上周對里賈納受傷，所以上周中對葡萄牙場波免役，𠵱家佢已閃電「復原」，噚晚對基爾禾隨隊出征。雖然截稿時未知佢係咪會落場，至少有隨隊證明無礙。我求大俠都講過佢幾乎逢國家隊有比賽就好似校啱時間受傷，擺明唔畀面查柏東尼，冇講錯啦。
前日係情人節，AC米蘭球會官方網站收到好多球迷愛的宣言，其中有幾個真係肉麻到死，係鬼佬鬼妹至噏得出。其他意甲球會情況點就唔知，不過AC傳統以嚟都係多帥哥，好似恩沙基咁，球迷咁瘋狂都算合理。唔知呢啲愛的宣言，可唔可以刺激起球員今晚對拉素嘅決心？
我求大俠睇波咁多年，自從聽過馬德里體育會主席基爾個名至今，經常聽見佢惹官非。近日佢就因為詐騙罪被判入獄三年半，肯定打擊到隊波嘅士氣。不過佢話人未正式坐監，就堅稱今晚對馬略卡場波一定會入場為自己隊波打氣，果然夠熱情。