馬會攞到開辦合法賭波權，主席夏佳理噚日上電台接受訪問，就慨歎十歲嘅細仔唔能夠繼承衣鉢，只愛睇波不愛睇馬，而且即使睇波，大家都心水迥異，佢捧「兵工廠」阿仙奴，仔仔就係「紅魔鬼」曼聯嘅擁躉。噚晚兩隊對壘，兩仔爺自然各捧各，佢話：「兩父子有排打。」不過夏佳理強調唔鼓勵個仔賭波。
夏佳理反而勸人，話若果想搵錢就唔好賭，而且賭波賠率有限，相信好難以小博大，「當玩吓消遣最好。」
講完個仔，夏佳理又自爆情人節本來諗住買花送畀老婆，但問完價先知要成八百蚊一打玫瑰，佢笑住話聽到個價錢「嚇窒咗」，即時打退堂鼓，轉頭去買咗條絲巾。八百蚊一打玫瑰好矜貴，不過同樣價錢嘅絲巾就夠實用，相信夏太唔會介意，不過夏太就冇回贈禮物，夏佳理酸溜溜咁話：「我冇收到禮物喎！」
八方重八到年初三嘅賀歲馬，有份大禮送唔出。當日入場嘅馬迷揸住票尾就可以參加抽獎，頭獎係一部價值十三萬嘅迷你房車，不過頭獎得獎者唔知係太豪氣定太大懵，竟然冇去領獎，馬會話惟有日後搵機會再抽一次獎送畀馬迷。
傳真︰2623-9278
電郵︰