採訪前向身邊友人打探24小時營業的食店，誰料答案來去都不外是茶餐廳，唔信，話晒香港出名是個不夜城，滿街多的是蒲至三更半夜的夜貓子，點會滿足早晚都食特餐、常餐。果然，在太子、旺角、灣仔等旺地，找到了這三間茶餐廳以外的食店，唔單止全日中門大開，燉湯、點心、焗飯、日菜、西菜統統有得食，如果你有胃口，食到朝早六點都重可以。
蒲酒吧，最忌係劈到半醉之際，舖頭夠鐘要拉閘打烊，就算原本玩得幾咁興高采烈都即刻掃晒興，幸好灣仔有間24小時營業的酒吧兼餐廳，可以畀你班蒲精劈完啤酒再「隊」紅酒，而且中途肚餓重有小食、頭盤、主菜及甜品全日供應。
麥記一個芝士漢堡十蚊就有交易，餐廳價卻賣貴6、7倍，可能你會覺得食水深，但試真吓全碟由麵包以至薯條皆自家製造，尤其每條用新鮮薯仔削製，再炸至金黃的薯條，無論味道及口感都勝過一般雪藏貨，實在貴得有道理。
呢份重量級早餐包括有煎雙蛋、腸肉、茄汁豆、燒番茄、煙肉及麵包等大堆食物，足已塞滿你整個肚皮，最抵死係美其名為早餐，其實全日24小時都可以order，絕對為日夜顛倒的夜遊人而設。
Bridge
電話：28655586
地址：灣仔駱克道93-107號
開業剛滿一個月的粥皇湯后，除有即蒸點心外，生滾粥和原盅燉湯才是店子的首本戲，故在材料方面也落足重本，粥料有斑片、花蟹、鮑魚、螺片、魚肚等貴價貨，燉湯全部原盅燉上幾個鐘，連帶店名也打正旗幟稱皇稱后。雖然店子並非處在旺區的中心，但凌晨時份經常座無虛席。
張小姐：半夜專登嚟飲湯
「我每個星期都會來3、4次，最鍾意飲呢度的燉湯，足料又無味精，唔使自己煲咁麻煩，試過半夜二點幾特登過來飲。」
小小的店堂也有個像樣的魚缸，內裏放着大廚每日新鮮購入的游水海鮮，包括一條條大中石斑，起肉後再鋪在即拉的腸粉內，絕對食得架勢。
以蓮子、人參、金華火腿粒、元肉、烏雞等多種材料，用原盅燉上四至五小時，味道清鮮中帶人參的甘香，據說對補中益氣、精神不振、調理身體甚有功效。
粥皇湯后
電話：31716666
地址：太子通菜街228號地下
位於旺角正中心的西餐廳dot，看準了旺角人流眾多的特點，再加上同區缺少同類型食店，開業不夠兩個月即延長營業時間至24小時，正如負責人Peter話齋：「旺角任何時候都推滿了人，尤其是夜晚好多人都會喺度轉車，要玩要蒲的地方又多，所以基本上由夜晚12點到凌晨6點，都有一輪輪的客人排隊食嘢。」為了配合呢班三更半夜先出沒的夜鬼，店子更順勢推出一個貓頭鷹套餐，比粥麵店、茶餐廳提供更全面的選擇。
後/白酒汁蟹肉蟹柳焗意粉$38
大大隻的田雞髀乍看似雞鎚，以白蘭地、胡椒、香草等醃上兩個鐘後，再蘸上脆漿炸至金黃，香口惹味，份量的骰唔怕太飽肚。至於用新鮮忌廉、白酒、蟹肉、蟹柳等焗製成的意大利粉，大件夾抵食，足夠你捧住肚返屋企。
平時散叫要$20一件的芝士餅及切餅，在貓頭鷹時段$30便包埋飲品一杯，款式約有15種，全部由自家餅房新鮮炮製，每隔一段時間便會換新款，當中以豆腐芝麻軟滑芝士餅及英國紅茶芝士軟餅最受女客歡迎。
dot
電話：23980992
地址：旺角西洋菜街138號地下2號舖
備註：以上各款貓頭鷹套餐包咖啡或茶一杯，供應時間為晚上12時至凌晨6時。