張可頤今年憑演出劇集《九五至尊》的呂四娘，人氣急升。呂四娘在《九》劇中與雍正是一對，在現實生活中，張可頤則視男友陳容森為結婚對象，不過她暫時未有結婚打算，她還要在事業上拼搏！皆因她不會像其他姐仔靠緋聞上位。
張可頤自九四年參選港姐入行，至今已有九年光景，這段日子以來，她公開承認的戀情只有兩段。一段是剛入行時的董姓圈外男友，雙方拍拖八年最終分手；另一段則是與楊寶玲前夫陳容森，他們拍拖至今三年多，不知陳容森是否她的結婚對象呢？
近年絕少談及感情事的張可頤破例開腔說：「如果我唔係咁諗，亦唔會同佢一齊，如果冇將來，我唔會同佢一齊，呢樣嘢我幾保守嘅。我亦唔會因為對方嘅新聞，而先入為主去睇嗰個人，我係都唔信邪，係要搞到自己損手爛腳。
「總之我要睇到佢裏面有一樣嘢值得我鍾意，先同佢行埋下半生，我先會開始、先會公開，我係咁嘅人。至於欣賞佢內在邊一方面，我驚佢鬆毛鬆翼，都係唔公開講。」
以張可頤的條件，外間總認為她與陳容森不太匹配，但當事人卻不認同，她說：「我之前遇過啲好好嘅男仔，又單身又有正常屋企，但就係點都夾唔到。或者以前對愛情嘅感覺好膚淺，但𠵱家會睇內在多啲，一定要啱key，雖然我𠵱家冇灌唱片，但我同佢喺音樂上好有溝通。」
今個月尾，可頤任職空姐的妹妹要出嫁了，妹妹爬頭結婚，可頤的父母又曾否向她催婚呢？她說：「冇噃，爸爸媽媽知我喺事業上重要奮鬥，重有好多嘢要做，唔應該咁快去結婚，不過妹妹結婚我都好戥佢高興。
「至於我自己會唔會結婚？我會結嘅，但生兒育女呢一分鐘我重好猶豫，因為做人父母責任太大，加上做我張可頤仔女嘅一定唔衰得，如果要我做媽媽，喺屋企瞓身湊仔，𠵱家重未得囉！」
髮型：PatrickWongfromPRIVATEI
場地提供：BOCAtapas&wine
化妝：YvonneTangfromPRIVATEI
鳴謝：陸智夫國術總會
