小公關YY做咗兩年半公關之後，覺得做事太辛苦，日日朝七晚七一星期五日，長期咁做，睡眠不足，可說身心俱疲。未入行之前，佢誤以為公關就係請客吃飯，對人歡笑，點知公關呢行其實十分辛苦，隨時疲於奔命。
小YY諗咗一輪，決定去讀酒店管理文憑，去瑞士食吓瑞士芝士，返到嚟就轉行，趁住旅遊業好景，迪士尼樂園開幕，唔多唔少都會有啲利益啩。公關阿姐就嚇佢：「做酒店重辛苦，男嘅娶唔到太太，女嘅嫁唔到人，人哋情人節食燭光晚餐好羅曼蒂克，你係酒店僱員，就要眼大大睇住，唔好有差錯。靚女，你諗過先至好！」
小YY話一於冇有怕，決定去瑞士讀書。臨行，公關大姐大叫佢去到瑞士火車站千祈要小心，因為火車站有「茄汁黨」，專吼外國女遊客，喺後面噴茄汁，搞污糟件衫，女客必然驚一驚，好狼狽，跟住有一位樣子幾純嘅青年行埋嚟，扮好心，遞上紙巾幫忙，勸女客到女廁洗一洗。大姐大喺日內瓦火車站就真係中過招，但佢跑慣江湖，閱歷豐富，死都唔入女廁，推住行李走人。一位日本師奶（日本人最注重儀容）就中計，走入廁所，一入去，就有兩三個男人衝入嚟，㩒住搶手袋，飛快地鬆人。大姐大告誡小YY：「我哋去到瑞士，人就鬆弛晒，警覺性低好多，好易中計㗎！」小YY又話冇有怕，識得照顧自己。年輕人就有呢個好處，天不怕地不怕，只係怕懶惰冇朝氣啫！