嘩！嘩！嘩！打到嚟喇。中東局勢愈嚟愈緊張，上個禮拜港股好似過山車咁，急跌完一輪又抽番上嚟。不過對於啲股仔嚟講，打仗唔係好大影響，反而成為班大戶推波助瀾嘅藉口，話個市無方向，啲資金專揀啲優質工業股嚟炒，結果造就咗好多股仔連升幾日。
有行家話，呢幾日隻亞洲鋯業（395）好似有批大戶收緊貨，個價之前跌到去1.15元就即刻反彈，不過成交都重係唔夠大。聽講今次想炒起隻股仔嘅大戶都係啱啱調錢落嚟，隻股應該重有得去。睇番上個禮拜亞洲鋯業嘅圖表，好有機會升穿個三角走勢，個行家重話，如果破咗位先至好追落去，到時賺錢機會大好多。
上個禮拜四上市嘅中國外運（598），上咗市兩日表現都係麻麻，據行家講，隻股喺上市前已經傳被圍齊飛，應該有機會造得好啲，但上市日最高都只係去到2.35元，跟住就反反覆覆跌到落最低2.2元，好似無乜料到咁。有市場人士就賴個市唔係好就。不過，聽番街外行家講，話隻股原本概念就唔錯，但其中有一個大戶原本諗住喺截止前縮沙，但點知縮唔切，結果中到一手都係，為咗唔好令隻股散落去，個大戶應承唔會大手掟落嚟，但係要隻股能夠飛天，就可能要等個市場消化咗呢批貨先至有得諗。
上兩個星期提過嘅意科控股（943）可唔可以由烏鴉變鳳凰，都要睇埋今個禮拜先知，皆因聽聞上次所講嗰單料推遲咗曝光，都係為咗要就班大帝嘅時間，究竟對方係乜水？伏勝暫且賣個關子，如果各位重未沽貨嘅話，不妨睇多一兩日㖭。
伏勝