歐洲行政房車
問亞Mark響呢個級別中會點揀？睇怕講多無謂，問十個人有八個都會揀上一代嘅平治E-Class，就算係2000年嘅行貨E240，早前嘅二手叫價都不過係27至28萬元左右；重想再平啲？就不妨考慮1998年嘅E230同E320喇！因為分分鐘唔使18萬就可以揸走部車㗎喇！
歐洲豪華房車
本來最佳選擇會係最新一代平治S-Class，而年份大概會係1999或2000年；不過，亞Mark覺得上一代尾期嘅S-Class，才是實至名歸嘅BestBuy之選。點解？真係又平又靚囉！好似1998年嘅S320L咁，早前嘅二手叫價大約30萬元，話晒係大Benz喎！至於Budget無咁多、但又想坐大車嘅朋友，就可以考慮吓上一代嘅寶馬7系，講緊嘅係1995或1996年嘅740i，唔使20萬元就有交易喇！
超級跑車
若然你正想買部二手超級跑車，去過吓車癮的話，相信你嘅選擇一定離唔開保時捷同法拉利。先同大家講吓保時捷，有興趣嘅朋友最好考慮911系列，以1996年嘅911Targa為例，有玻璃頂及選用Tiptronic半自動波箱，而且重係配用氣冷式引擎，大約40萬元左右就有交易；想平啲亦可以選擇硬頂嘅911Carrera，唔使30萬元就有交易。
至於想揸法拉利嘅朋友，360Modena二手叫價依然高企，反而之前嘅F355卻來得重吸引，而且正式係買少見少；如果可以的話，可試試搵部1997或1998年嘅F355，最好係Spider開篷版㖭！不過，當然無70萬元喺手就免問啦！
SUV
較早前，保時捷正式推出全新Cayenne車系，因而令城中一班富豪紛紛準備買車，而當中又有唔少準買家，手頭上都會有部平治M-Class；所以相信今年嘅二手市場上，將會有好多二手M-Class湧現，令二手叫價將受頗大壓力。如果無估計錯誤的話，2000年嘅ML320將會係約30萬元，你都咪話唔吸引。
開篷車
講最平嘅二手開篷車？首選梗係標緻206CC啦！事關新車車價由2001年嘅$183,000，減至2002年嘅$139,000，咁你哋話佢個二手價又會點呢？如果亞Mark無估錯的話，2001年嘅206CC無論係自動波抑或係手波，以目前情況睇嚟，約8萬元左右嘅二手價絕不為過，可謂抵買到極。
至於貴價開篷車，首選係平治CLKCabriolet，無論係行貨定水貨，2001年嘅CLK230Cabriolet二手叫價不過係約30萬元，而CLK320Cabriolet則可貴多約6萬元。
歐洲中型房車
響呢個級別中，亞Mark嘅選擇只會有兩個，一個係寶馬3系，以1998年嘅318i為例，家陣嘅二手叫價都只係約16至17萬元左右；想揀部年份新啲嘅，就可以選擇2000年嘅320i，二手叫價都只係22至23萬元左右。但如果你Budget無咁多，而又想坐歐洲名牌房車的話，就真係Sorry喇！事關選擇唔多，只有上一代嘅平治C-Class可供選擇，當中又以1999年嘅C200(約11萬)同C240(約14萬)會係最佳選擇。