本田Fit（即港版Jazz）自推出以來，一直成為車迷追捧目標，風頭可謂一時無兩；而早前廠方更響日本本土推出配用1.5公升引擎及MultiMaticS7前速半自動波嘅1.5T型號，以迎合不同用家需要。雖然代理方面暫未有任何行動，但坊間某大獨立車行卻率先將之引入，究竟部車有幾好玩？有興趣嘅朋友，就要留意我哋今日嘅介紹喇！
記者、攝影：黃凱穎
從外表而言，呢部Fit1.5T與現時仍在熱賣中嘅1.3型號相近，只係頭燈及尾燈組合略作修改，若不留心觀察，實難將兩者分辨出來；不過，大家仍可從車尾嘅Fit徽章辨別兩者，因為呢部1.5T型號，車尾Fit徽章上嘅圓點係改用藍色示人，而1.3型號則以紅色出現。
率先抵港嘅本田Fit1.5T，係配用一台1.5公升直4SOHCVTEC偈，動力輸出數值較原有1.3公升直4i-DSI偈充裕之餘，而且亦有相近嘅低耗油量紀錄；另外匹配上一套7前速MultiMaticS半自動波箱，除可作自動波車駕駛外，你更可以透過設於軚盤上嘅+/-按鍵轉換波檔，從而給予你有駕駛手波車嘅快感㗎！然而，由前輪柱式獨立及後輪扭力連桿組成嘅懸掛系統，輔以四輪15吋輪胎，行車循迹性之高亦能予人有莫大信心呢！
與現有1.3型號一樣，車廂空間亦以闊落見稱，而且座椅配搭更可以稱得上係靈活多變，除後排椅背能收摺放平，以增加尾箱載物容量外，就連座墊更可整幅拉高，以便存放高身物件㗎！不過最吸引嘅，相信會係三幅式跑車軚環，因為佢不但能為你提供頗佳嘅把持感，兩旁更設有+/-轉檔按鍵，方便你轉換波檔，就連表板亦改換上跑車化嘅白色圓表組合，從而變得更具吸引力㖭！設備配搭亦見一應俱全，除電窗、電鏡及中央門鎖外，另外重有原廠冷氣及高級音響等配備㗎！
引擎：1496cc直4SOHCVTEC
馬力：110ps/5800rpm
扭力：14.6kgm/4800rpm
傳動：7前速半自動波，前輪驅動
懸掛：（前）柱式獨立（後）扭力連桿
制動：（前）透氣碟（後）鼓式（ABS）
輪胎：185/55R15
尺碼：3830×1675×1525mm
軸距：2450mm；車重：1040kg
平均耗油：18.4km/L
新車售價：$138,000
車輛提供：穎進汽車（27187919）
新車造型依舊保留有Fit原有嘅年輕活潑兼富動感嘅造型，車廂設備配搭亦見齊全易用；而改用上一台1.5公升VTEC偈後，動力輸出除較原有1.3型號更強勁外，匹配一套MultiMaticS7前速+/-半自動波，重能夠為你增添不少駕駛樂趣呢！