首先覆幾位讀者。Vivian問英國私立寄宿學校情況與學費，因左丁山唔熟，唔敢答，鎖你鎖你。
Lydia請左丁山介紹可靠師父，等佢問流年運程及做一份命書，唔係話唔識，但為免有任何誤會，自己從來都唔介紹邊一位師父代讀者算命，鎖你鎖你。
Alice問《玄來問亞桂》可以喺邊度買得到，行勻大書局唔見有；左丁山喺好多中環報攤見過，請你問相熟報攤。
Solomon話新年回鄉探親，錯過咗年初二嘅「羊年股市」，咁好易啫，請你上《蘋果日報》網站，可以睇番。
玄學是否有用，好難講，二月十日《蘋果日報》報道，新年期間，謝瑞麟珠寶請咗玄學家到一間分店，向人客介紹「開運」金飾，結果生意唔見得好咗，本地人消費意欲仍然低迷咁話。
但另外一間紅磡珠寶工場，生意做唔切喎，新春假期做咗成三千萬生意，客源全部係內地客。呢間工場冇「風水噱頭」，但有「黃金噱頭」，就係不惜工本，喺場內做咗一個純黃金打造嘅廁所，人客坐響黃金抽水馬桶上面，特別有黃金式享受，造一個黃金廁所，包括內牆、馬桶、洗手盆、水龍頭，成本唔少，但點都貴唔過三千萬，好多人鍾意在工場買完黃金及珠寶就到廁所行吓，視為香港一景，工場老闆與黃飛鴻徒弟同名同姓，確有諗頭，唔怪得做生意做到肥過豬肉榮，連風水師都爭佢唔贏！