小初一直唔明點解投資公司股價可以長升長有，但噚日出現富泰大中華（1226）股價勁插事件，講明違反傳統智慧嘅事始終唔長久。
富泰大中華股價一開市就勁跌，最低見過0.26元，在中午前突然停牌，按盤價0.335元，仍大跌67.8%，但成交股數唔算多，只得674.8萬股。經紀陳話，如果唔停牌，晏晝重有交易嘅話，睇怕唔只咁細成交。
富泰大中華於舊年9月，以每股0.50元招股上市，上市以來股價升個唔停，公司在舊年11月被監管機構抽秤，自爆街貨主要由12個人持有。既然人哋都認咗係私人派對，所以股價出現乾升乾跌，實在唔難理解，如果有坐貨者，一旦唔玩沽貨套現走人，其他股東唔一定肯接貨，股價難免因此而急跌。
至於同係長升長有嘅投資股第一亞洲資本（1227），股價似乎未受到波及，噚日只係微跌1個價位，收1.06元，繼續企在高位。
慕容小初