前幾日劈炮唔撈、九月唔再做地鐵主席嘅蘇澤光（圖），噚日神采飛揚去中總新春酒會，同老友記摸摸酒杯底，點都睇唔出佢有半點離愁，惟獨是俾記者追訪嘅時候，佢就真係頭都大埋。
話說噚日當記者喺酒會人群中發現JackSo，佢又發現記者時，佢不出五分鐘就閃身離開，記者追落香港大會堂酒樓條樓梯問佢未來有乜大計，佢都話冇任何計劃，重多次話以前老師教落：「言多必失」喎。
當JackSo落到樓下先發現架車未嚟，真係整定要講多幾句啦！佢話至今為止都冇獵頭公司搵佢，電話都冇響過；對於有人話佢走得好失落，佢仰天大笑，話自己可以做嘅嘢都做晒，又點會失落？佢重讚田二少係一個有抱負、有衝勁、有能力嘅人㖭。
陳廣慧攝
傳真︰2623-9278
電郵︰